KRALENDIJK – Qredits Boneiru a inisiá un edishon nobo di Agri Business Academy riba 25 di òugùstùs. E programa di 13 siman ta prepará 13 empresario i futuro empresario pa desaroyá aktividatnan komersial den e sektor agrario.
Durante e programa, partisipantenan ta siña tokante desaroyo empresarial, investigashon di merkado, marketing, kalkulashon di kosto i planifikashon finansiero. Paso pa paso nan ta traha riba nan propio plan di negoshi i plan finansiero, ku atenshon pa e oportunidatnan i retonan spesífiko di Boneiru.
E programa no ta limitá na agrikultura i krio di bestia. Tambe ta trata prosesamentu di produkto lokal, servisio agrario i otro aktividatnan ku ta forma parti di e kadena di produkshon di kuminda. Métodonan inovativo di produkshon ta forma parti di e kontenido.
Segun Qredits, e meta ta stimulá emprendementu i kontribuí na un produkshon lokal mas fuerte i sostenibel, den un situashon kaminda Boneiru ta dependé pa un gran parti di kuminda importá.
Pa e ehekushon, Qredits ta kolaborá ku organisashonnan i profeshonalnan di e sektor. E programa ta risibí sosten di Ministerio di Asuntunan Ekonómiko i Klima.