KRALENDIJK - Seis organisashon, Jong Bonaire, Terramar Museum, STINAPA, Biblioteka Publiku di Boneiru, Scholengemeenschap Bonaire i enseñansa primario – ta uni forsa pa traha huntu pa mas konekshon, partisipashon i envolvimentu na Boneiru.
E inisiativa a nase for di e Festival di Siudadania di òktober 2025. For di e festival a nase e deseo pa mira siudadania den un sentido mas amplio ku solamente komo parti di enseñansa. Partisipá den komunidat ta algu di nos tur: di hoben i hende grandi, di habitantenan i organisashonnan, i di e diferente komunidatnan riba e isla.
Ku Loke ta uni nos, e partnernan ta konektá nan propio aktividatnan i inisiativanan. Asina nan ke krea mas oportunidat pa habitantenan topa ku otro, papia huntu i partisipá. Hobennan ta haña un bos kla i visibel, i kultura ta wordu usá komo un manera pa konektá hende ku otro. Tambe lo organisá diálogo tokante temanan importante manera demokrasia i futuro di Boneiru.
E organisashonnan ta keda independiente i ta traha huntu for di nan propio rol i eksperensia. Dor di uni forsa, nan ke kontribuí na un Boneiru kaminda habitantenan ta sinti nan mes envolví i kaminda nan ta haña espasio pa partisipá i ehersé influensia.
E inisiativa ta wordu stimulá pa gezaghebber John Soliano i sostené pa Rijksvertegenwoordiger interino Jan Helmond i Ministerio di Asuntunan Interno i Relashonnan den Reino.
Mas informashon lo ta disponibel pronto riba: https://www.facebook.com/loketauninos/