WILLEMSTAD – Federashon Dutch Caribbean Mental Health (DCMH) a reuní 122 partisipante na Universidat di Kòrsou riba 10 di sèptèmber, Dia Mundial di Prevenshon di Suisidio. Otro interesadonan di vários isla a sigui e programa di mainta via livestream.
Bou di e tema “Huntu den Prevenshon, Huntu den Speransa”, e seminario a enfoká riba interkambio di konosementu i kolaborashon regional. E presentashonnan a trata prevenshon di suisidio for di un perspektiva lokal i global, salú mental di hóben i e resultadonan prinsipal di e estudio Regiobeeld GGZ CAS-BES 2025.
Durante e atardi, partisipantenan a sigui workshop tokante gruponan vulnerabel, prevenshon na skol i un introdukshon na prevenshon di suisidio brindá pa 113. Famianan ku a pèrdè un ser kerí pa suisidio tambe a kompartí nan eksperensianan. E kombersashonnan a trata rekonosementu di señalnan i e importansia di sosten i kolaborashon den kuido.
Den e panel di klausura, atenshon a bai pa e retonan den komunidatnan chikitu, entre otro stigma, bareranan kultural i involukrashon di famia. A enfatisá e nesesidat di identifiká problemanan na tempu i krea espasio pa papia abiertamente tokante salú mental.
Atenshon durante hinter aña
Segun DCMH, prevenshon ta eksigí atenshon durante henter aña i un esfuerso konhunto di famia, amigu, skol, profeshonalnan di kuido, organisashonnan sosial i gobièrnu.