KRALENDIJK – Kapmentu di e palunan di Neem den sentro di siudat di Kaya Grandi no tin nada ke ber ku Regata segun direktorado di Desaroyo Urbano. Ku esaki Herson Martinus di R&O ta kontradesí deklarashonnan di empleadonan ku anteriormente a deklará na Bonaire.nu na e sitio ku e trabounan ta relashoná ku e evento i ponementu di e podio grandi.
“No ta solamente zagmentu di un palu pa pone un podio”, Martinus ta bisa. Segun Martinus a anunsiá e trabounan lunanan atras kaba i nan ta forma parti di remodelashon di sentro di siudat, ku entre otro mehorashon na desagwe i infrastruktura.
Martinus ta firme tokante un relashon ku Regata. “Mi por sigurá bo ku di bèrdat e no tin nada ke ber ku Regata. Ègt nò.”
‘Regata a drenta mei mei’
Segun Martinus R&O ta sigui su propio planifikashon ku ta trahá pa basta tempu kaba. Ku e trabounan ta tuma lugá awor djis promé ku Regata, e ta yama un kasualidat.
“Regata a drenta mei mei. Nos no a plania esei asina ei”, e ta bisa. Segun Martinus e plannan pa sentro di siudat no ta sintonisá ku e evento. “Nos plannan no ta dependé di dje tampoko. Nos no a traha nos plannan ku esei komo punto di bista òf komo meta.”
R&O ta papia di dos palu
Martinus ta bisa ku fuera di esei a eliminá dos palu di neem. “Ta e úniko dos palu ku nos a eliminá tambe.” Segun Martinus a wak promé si por a mantené e palunan.
Segun Martinus spesialmente e raisnan di e palunan di neem tabata okashoná daño. Serka un di e palunan segun Martinus e rais a krese dor di e superfisie di e kaminda i a forma un tipo di drèmpi den kaya natural.
“Nos a wak tambe e opshonnan pa eliminá podisé solamente e raisnan”, e ta bisa. Esei lo a sosodé den pasado kaba, pero e raisnan tabata krese bèk segun R&O i kousa daño di nobo.
‘Nos ta preferá di kap ningun palu’
Martinus ta bisa di tin komprenshon pa e krítika riba eliminashon di palunan di sombra.
“Nos ta preferá di kap ningun palu. Boneiru semper tin un eskases di palu. Nos ke kultivá netamente mas bèrdè, pasobra esei ta kombatí strès di kalor.”
Segun Martinus ta bai pone palunan lokal nobo na nan lugá. “Ta bini palunan nobo si, palunan lokal tambe.” Intenshon ta pa finalmente haña mas bèrdè i mas sombra den e sentro di siudat segun Martinus. “Den pasado tabatin solamente piedra, piedra, piedra. Nos ke kita for di esei.”
Ki dia ta bai planta e palunan nobo, Martinus no por a bisa ainda. E ta spera si ku pa gran parti nan bini na e mésun sitionan.
“Ta bini hopi mas bèrdè ku tabatin anteriormente,” Martinus ta bisa.
Fangu mas awa di yobe
E intenshon di e trabounan segun R&O ta pa mehorá desagwe den sentro di siudat. Ta bai pone èkstra tankinan pa fangu awa. Eseinan mester pèrkurá ku sedimento di awa di yobe por sak bai abou promé ku e awa bai direkshon di laman.
Segun Martinus awa di yobe ora tin yobida normal no ta bai laman dirèkt. Solamente ora di yobida fuerte esei lo por sosodé. “Nos ke prevení hustamente ku hopi awa di yobe òf awa sushi drenta laman.”