KRALENDIJK – Por lo pronto no ta tira kabritu mas den Parke Nashonal Washington Slagbaai. Ministerio Públiko Boneiru i STINAPA a palabrá ku otro ku ta bai wak un otro manera promé pa redusí e kantidat di kabritu den e parke. Esei segun diputado Dennis Martinus.
“Nos a palabra ku nos ta bai stòp por lo pronto ku tiramentu di kabritu”, Martinus ta bisa tokante un kòmbersashon ku gobièrnu a hiba ku STINAPA. Segun Martinus mester wak seguidamente kon por kontinuá ku e manera tradishonal di eliminá kabritunan for di e parke.
E diputado ta enfatisá ku e intenshon pa mitigá e kantidat di kabritu den e área di naturalesa ta keda vigente. “Nos ke stòp promé ku e tiramentu i despues nos ta bai buska huntu ku Stinapa un solushon: kon nos por pèrkurá ku e parke tin ménos kabritu posibel?”
No ta tira mas
Riba e pregunta ku si na e momento aki ta tira ainda, Martinus a kontestá ku esei no ta e kaso. “E palabrashon ku STINAPA ta ku nan no ta tira mas pa un periodo indefiní.” E ta aklará ku ta trata di un stòp temporal, te ora ku tin mas klaridat tokante un otro aserkamentu.
Un punto importante segun gobièrnu ta ku por usa kabritunan ku saka for di e parke mas tantu posibel. Durante e kòmbersashon ta mustra tambe riba e problemanan práktiko entorno di prosesamentu di karni di bestianan ku ta tira den e parke.
Tipo di bestia di kas
Elvis Tjin Asjoe ta bisa ku e punto di salida ta keda ku mas tantu kabritu posibel mester disparsé for di e parke. “Saka mas tantu for di e parke, pero us’é tambe”, e ta bisa. Segun Tjin A Sjoe mester purba di saka e bestianan bibu for di e parke. Si esei no ta resultá posibel, tiramentu finalmente ainda por ta un opshon, pero e ora ei “na un manera ku por usa e karni”.
Tjin Asjoe ta bisa ku e sentimentu sosial rondó di tiramentu di kabritu ta hunga un ròl. “Kabritunan a bira un tipo di bestia di kas tambe”, e ta bisa. P’esei segun Tjin A Sjoe e tópiko ta sensibel na Boneiru.
No a disidí ainda kon e aserkamentu nobo lo ta presis. Gobièrnu i STINAPA mester sigui traha palabrashonnan riba esei.
A pidi Direktor di STINAPA Melissa van Hoorn pa un reakshon, pero el a laga sa ku e no ta logra duna un aklarashon na e momento aki.