KRALENDIJK - Djasabra anochi a konmemorá e echo ku e époka di aviashon a kuminsá na e isla nobenta pasá, ku aterishe di e avion di KLM Oriol riba un pista di aterisahe improvisá na Subi Blanko, leu for di e luga kaminda e Aeropuerto Flamingo ta awendia.
Durante un resepshon na Divi Flamingo Beach Resort & Casino, diferente oradornan a para ketu na e momentu históriko aki, i e importansia ku aviashon tin awendia pa e isla di Boneiru.
Gezaghèber John Soliano a suprayá den su diskurso e gran importansia di aeropuerto i di aviashon pa e isla i su habitantenan. El a señalá no solamente turismo, sino tambe e ròl importante ku e konekshonnan ta hunga pa Bonerianonan ku mester bai afó pa nan estudio, tratamento médiko òf otro motibu.
Direktor di KLM, Marjan Rintel, no tabata presente físikamente, pero a duna un diskursó grabá via video. KLM Country Manager di e islanan ABC Dirk Buitelaar si tabata presenti i a felisitá Boneiru ku nobenta aña di historia di aviashon i e laso largu ku KLM. Boneiru ta i lo sigui ta spesial, asina Buitelaar a bisa.
Direktor Elisiër Angel di Tourism Corporation Bonaire a referí den su kontribushon riba un nota personal a konta ku su abuela, meskos ku e aviashon na Boneiru e aña aki a kumpli nobenta aña. Angel tambe a papia tokante e gran importansia di aeropuerto i aviashon tantu e turismo i ekonomia, komo e komunidat den su totalidat.
Na nòmber di e hunta di komisario di aeropuerto Flamingo, Camiel Eurlings a duna un splikashon tokante e plannan den futuro serkano di aeropuerto. Segun Eurlings, den e añanan benidero lo traha riba inversionnan grandi i un ekspansion konsiderabel di e terminal eksistente. Na mes momento el a suprayá ku e karakter di e aeropuerto aktual mester keda preservá. E aeropuerto lo sigui tin su atmosfera karakterístiko, asina Eurlings a bisa, kende a indiká ku por ehempel no lo bin slùrf pa abordá. Biaheronan lo sigui embarká i desembarká den aire liber tambe den e futuro, algu ku segun e komisario ta parti di e eksperensia úniko di Boneiru.
Despues di e parti ofisial a sigui un enkuentro informal ameno, kaminda e invitadonan huntu a mira bèk na nobenta aña di historia di aviashon na Boneiru.
Foto - ABC Online Media