KRALENDIJK - Tur aña Rotary Club Bonaire ta organisá un fin di siman speshal pa muchanan. Riba djabièrnè 22 di mei, banda di mitar di sinku di atardi, 33 mucha huntu ku nan guianan a yega na e kas grandi na Slagbaai. Manera semper, e muchanan a haña un tas ku un kusinchi, bestèk, tayó, beker, skeiru di djente, pasta di djente i otro kosnan ku nan mester pa pasa e fin di siman. Ora e programa a kaba, nos por bisa ku tabata un fin di siman hopi exitoso.
E aña aki, e fin di siman a haña un sponsor di un forma masha speshal. Esaki tabata den kuadro di e kuarenta aña di eksistensia di e kompania di un ex-Rotario ku semper tabatin e muchanan na su kurason. Danki na esaki, Rotary por usa e suma ku tabata reservá pa otro proyekto.
Ko-organisadó Shaedra Baromeo a presentá e lidernan na e muchanan i a splika e reglanan. Manera semper, e fin di siman a kuminsá ku e muchanan a instalá nan mes den e kambernan di drumi den e edifisio Mangazina. Durante esei, e Rotarionan tabata okupá ku preparashon di e hamburgernan. E ambiente tabata yen di alegria i bochincha te lat anochi riba djabièrnè.
Despues di desayuno, e lidernan a organisá diferente aktividatnan riba djasabra. Tabatin landamentu, hungámentu, kanamentu, i hasta un grupo ku a subi Brandaris! Promé ku almuerso, e muchanan por a prepará nan mes pizza, ku despues a wordu pone riba barbecue. Tambe e parti aki a resultá di ta un gran éksito un biaha mas e aña aki.
Despues di sena, e fiesta a kuminsá di berdat. E guianan a organisá un diskotèk pa e muchanan, i nan a disfruta masha hopi mes. E anochi a sera ku un buskeda di soldachi pa e kareda di djadumingu. Ku tantu aktividat durante di dia, no tabata straño ku e kamernan di drumi a bira trankil masha lihé.
E mainta di djadumingu, ku tabata yená ku landamentu, kanamentu i diferente weganan, a wordú sera ku e tradishonal kareda di soldachi. E soldachinan a wordú animá ku hopi entusiasmo pa nan propio tim. Despues di anunsiá e ganador, tur tim a haña un medalja i tabata tempu pa almuerso. E tim di barbecue a traha duru durante henter e fin di siman.
Promé ku nan a bai, e muchanan a grita un “masha danki” ku hopi entusiasmo pa e sponsor, Rotary i e lidernan. Pa loke por a sinti for di manera ku e muchanan a pidi pa keda, ta hopi kla ku e fin di siman tabata un gran éksito.