KRALENDIJK – Segun espektativa Boneiru ta haña un plan di maneho nobo pa e populashon di buriku. Den luna di òktober ta tene kòmbersashon- i seshonnan pa esaki ku partidonan konserní. “E promé investigashonnan ta kanando kaba”, diputado Dennis Martinus ta bisa.
E maneho di buriku ta parti di e atenshon mas ámplio pa bienestar di animal. Segun Martinus ta bai mas pa entre otro konsientisashon serka hendenan ku bestianan di kas, pero tambe pa e situashon rondó di burikunan riba e isla. “Nos ta bai atendé tambe ku e proyekto di buriku.”
Promé Martinus a menshoná òktober komo e momento pa e plan di maneho, pero el a korigí su mes durante e kòmbersashon. “Ta tene e seshonnan den luna di òktober. E plan ta bini e ora ei den luna di yanüari.”
Loke ta bin finalmente den e plan, no ta determiná ainda. Segun Martinus Segun Martinus mester determiná promé “kua metódika ta pas mihó”.
Kompania Merikano
Entidat Públiko Boneiru ta embolbí guia eksterno pa esei. “Nos tin un kompania Merikano den besindario ku tin eksperensia ku trata temanan difísil”, Martinus ta bisa. “Esei ta bai trese tur partido huntu.”
Esei ta importante segun Martinus pasobra e tópiko ta delikado i tin diferente pensamentu kon tin ku anda ku e populashon di buriku. Martinus ta rekonosé e tenshon ei. “Eksaktamente, pero e kompania aki tin eksperensia ku esaki. Pues na sierto momento nos ta yega na un plan si.”
No ta menshoná medidanan konkreto na e momento aki ainda. E investigashon- i kòmbersashonnan mester mustra promé kua aserkamentu ta faktibel i deseabel na Boneiru. E kompromiso ta pa tin e plan di maneho kla den luna di yanüari.