KRALENDIJK – Water – en Energiebedrijf Bonaire (WEB) ta realisá diferente trabou di inspekshon i reparashon riba kabelnan di koriente bou di tera na vários lugá for di djabièrnè 7 di febrüari te ku djadumingu 9 di febrüari. E trabou ta enfoká riba optimalisá e konfiabilidat i efisiensia di e ret di koriente.
Despues di interupshonnan resien, WEB a laga hasi un investigashon forénsiko preliminar. Esaki a indiká ku investigashon adishonal riba e kabelnan instalá na fin di añanan 2000 ta nesesario. Pa por hasi inspekshon di partinan importante di e kabelnan aki, WEB ta haña su mes obligá di deskonektá temporalmente algun konekshon na un manera kontrolá.
Banda di esaki WEB lo instalá un sistema avansá, e asina yama ‘Smart Cable Guard’, pa kontinuamente vigilá e kondishon di e kabelnan. Na mes momentu lo instalá sensornan di temperatura, ku ta duna dato balioso tokante e kondishon di e konekshon. E medidanan aki ta kontribuí na un ret mas stabil i uso efisiente di energia.
Pa por realisá e trabounan ariba menshoná, WEB a planifiká pa deskonektá un sirkuito den anochi di djabièrnè 7 pa djasabra 8 di febrüari i un otro sirkuito den e anochi di djasabra 8 pa djadumingu 9 di febrüari. Esaki ta nifiká ku un di e dos konekshonnan semper lo ta den operashon.
Aunke WEB no ta premirá ku e trabou aki lo tin impakto riba suministro di koriente pa klientenan di WEB, tin un ches chikí di un interupshon. Pa limitá e impakto riba klientenan mas tantu posibel ,e trabounan lo ser realisá durante oranan di anochi, esta di 11:00 di anochi pa 09:00 mainta.
E trabounan lo tuma lugá solamente riba kabelnan bou di tera banda di Kaya Korona. P’esei WEB ta pidi outomobilistanan pa tene kuenta ku posibel aktividatnan kantu di kaminda.