KRALENDIJK – Djasabra anochi, Fundashon EQ, ku ta sali na interes di e komunidat LGBTQ+ na Boneiru, a selebrá su di 10 aniversario den un selebrashon modesto.
E presidente di EQ, Judith Brekelmans, a reflekshoná riba e historia di e fundashon i a ekspresá gratitut na esnan ku a forma parti di e inisiativa for di komienso. “No tabata fásil tur momento, pero aki nos ta, selebrando 10 aña,” Brekelmans a bisa. Ku un kinipí di wowo Brekelmans a bisa “Esta yòn nos tabata den e tempu ei,” referiendo na diferente pòtret ku a saka den transkurso di e 10 añanan di eksistensia di e fundashon.
Èks-gezaghèber Nolly Oleana a bisa ku den su tempu komo mandatario, semper a apoyá e inisiativanan di EQ. “Sèmper mi a kere ku esaki ta importante. Rèspèt pa otro ta krusial den un sosiedat, asta pa hende ta diferente for di bo.” Pa su esfuersonan, Oleana aña pasá a risibí e EQ Award aña pasá.
Historiadó Bòi Antoin, riba petishon di e fundashon, a tene un charla tokante e historia di e komunidat LGBTQ+ na e isla. “Di mes, semper tabatin hende homoseksual na e isla, pero no tabata un tema di kual hende tabata papia abiertamente,” Antoin a bisa. Inisialmente no tabata usa palabra spesífiko pa referí na hende homoseksual. “Simplemente tabata referí na hòmber homoseksual komo hòmber ku ta komportá nan mes manera muhé, i di muhénan lesbiana tabata bisa ku nan tabata komportá nan mes manera hòmber.” Antoin tambe a menshoná susesonan ménos favorabel di historia, inkluyendo akusashon kontra di dos polítiko prominente meimei di siglo 20, instigá pa nan kontrikantenan polítiko ku e meta pa daña nan nòmber.
Akseptashon kresiente
Tanto Brekelmans komo Antoin a señalá ku e aktitut pa ku hende LGBTQ+ ta kambia gradualmente na Boneiru, ku mas aseptashon pa hende ku tin un estilo di bida diferente for di esun tradishonal.