KRALENDIJK – E ekipo di filmashon Boneriano, konosí komo Team Filmingo’s, ta na punto pa pone un paso importante den mundu sinematográfiko internashonal. Despues di nan viktoria na un proyekto sinematográfiko lokal, kaminda nan a haña no ménos ku shete galardon prestigioso, nan ta biaha awor pa Seattle pa e evento Film Apollo 2025. Lider di ekipo Calvin Richi, ku ta un di e miembronan di grupo tambe, a kompartí ku hopi entusiasmo nan storia na momento di nan salida.
E grupo a haña solamente 48 ora pa traha un pelíkula kompleto ku un grupo chikitu. A finalisá e tarea ku éksito i no sin motibu: a premia nan obra ku shete galardon, bou di kua e preis máksimo pa mihó pelíkula. “Bo ta kuminsá djabièrnè anochi 7’or i djadumingu anochi 7’or bo mester entregá bo pelíkula.,” Richi ta konta di e proseso intenso. “Tabata un lucha duru, kaminda nos a traha sin drumi pa tene e kalidat mas haltu posibel.”
Un chèns úniko
Banda di filmashon mester a editá tur kos tambe. Danki na trabou duru i talento kreativo a premia Team Filmingo’s. Di e djeskuater premionan ku a entregá na Boneiru, shete a bai pa e grupo aki. E viktoria ei no a nifiká solamente rekonosementu, pero tambe e oportunidat pa biaha pa Seattle. “E evento na Amérika ta dura kuater dia i ta ofresé tayer di profeshonalnan prominente di industria sinematográfiko,” Richi ta splika. “Nos ta spera di siña hopi i pone konekshonnan balioso.” E grupo lo no traha un sine nobo na Seattle, pero durante entrega di premio lo mustra e pelíkula ku nan a traha na Boneiru.
Speransa riba rekonosementu internashonal
Ounke e ekipo a gana hopi premio kaba, rekonosementu internashonal ta keda nan meta final. “For di komienso di e evento na 2018 Boneiru no a gana nunka ainda un premio internashonal. Nos ta spera di trese un kambio den esaki,” Richi ta bisa desidido. E ta spesialmente orguyoso di e sinematografia di nan pelíkula. “Si nos haña maske ta un nominashon, mi ta dal un salto den laira. Mi ta kere ku e ta posibel e aña aki, pasobra mi ta orguyoso riba e resultado. A organisá tur kos te na e último detaye.”
Plannan pa futuro
Despues di nan Aventura na Seattle Team Filmingo’s ta en buska di proyektonan nobo kaba. Tin komersial- i pelíkulanan planiá, kaminda nan ta keda traha huntu ku tantu sosionan lokal i internashonal. “Nos ta masha gustá kaba i ta spera ku e biahe aki ta sigui ámplia nos posibilidatnan,” Richi ta konkluí.