KRALENDIJK - Djadumingu 30 di mart, un trùk transportando 29.000 liter di diesel a bòltu na altura di Karpata.
Un kantidat di kombustibel a resultá den laman. Servisionan di emergensia a presentá na e sitio. A transportá e shofùr pa hospital pa tratamento médiko. A tuma medidanan inmediato pa limitá e konsekuensianan di e diesel ku a basha. Un trùk di “vacuüm” di BOPEC a saka e sobrá di diesel for di kantu i a kubrí un parti di e área afektá ku santu.
Un kran a yega na e sitio pa bai ku e trùk, i tin santu adishonal disponibel pa kubri e area unda e trùk tabata situá.
Segun STINAPA i Havenmeester, e diesel ku a lèk no ta forma peliger inmediato pa e parke marino pasó e kapa fini di zeta, e no ta senk i ta evaporá lihé.
Kaminda será
E kaminda den e área di e insidente ta será pa tráfiko te ora ku finalisá tur trabou. Ta monitoria e situashon di serka.