KRALENDIJK- Durante oranan di mainta riba Dia di Rincon, Direktorado di Supervishon i Mantenshon di Lei di Entidat Públiko Boneiru (OLB), Kuerpo di Bombero Hulanda Karibense (BKCN) i Kuerpo Polisial Hulanda Karibense (KPCN), huntu ku e komishon organisadó di Dia di Rincon, a tene kòntròl riba stèntnan.
A kontrolá e kumplimentu ku e kondishonnan di seguridat i pèrmit. Aki a kontrolá entre otro si tabatin sufisiente distansia entre tènt i stèntnan pa limitá molèster i peliger di kandela, si tabata usa solamente bòter di gas chikitu ku ta poné korektamente pafó di e stènt i ku ta disponé konekshonnan seif, i si tabatin aparatonan di paga kandela manera ‘brandblusser’ òf slan na stèntnan na kua ta kushiná òf grel.
Tambe a kontrolá si aparatonan di kushiná i aparato eléktriko tabata pagá ora esaki no tabata den uso, si tabatin ophetonan pegá na bòrchi di tráfiko, palu di lus òf monumentu, i si e rutanan di emergensia tabata liber di opstákulo. Ademas a wak si tabata usa bòter di glas òf bestèk frágil.
Banda di esaki a pone atenshon èkstra na siguridat di kuminda. A kontrolá e kondishonnan higiéniko i entre otro a midi e temperatura di kuminda kayente i friu. Na unda tabata nesesario a atendé ku e doño di stènt i mesora a hasi e ahustenan nesesario.
Aktitut konstruktuvo
E servisionan ta ekspresá nan apresio pa e aktitut konstruktivo i koperashon di doñonan di stènt. Den transkurso di e dia lo sigui tene kòntròl na diferente orario, ku e meta pa sostené un selebrashon seif i ordená di Dia di Rincon.