KRALENDIJK / WILLEMSTAD – Djadumingu, 7 di yüni 2026, e talento Boneriano den kareda di outo pa radiokontrol (RC), Ethuriel Nicolaas, lo biaha pa Kòrsou pa e apertura ofisial di e temporada nobo di kareda. Nicolaas lo partisipá den "Kareda #1", e promé kareda di e kampeonato di touring cars eléktriko di eskala 1/10 (on-road). E evento aki, ku hopi hende ta spera, ta keda organisá pa Curaçao Radio Control Cars Drivers Association (CRCCDA) na e konosí CAS Grandi Raceway.
Ethuriel Nicolaas lo representá Boneiru den e kategoria hopi kompetitivo di 21.5T Stock Class, kaminda abilidat di stür i e setup tékniko di e outo ta hunga un papel sentral. Nicolaas lo drenta e pista ku e avansá shasi Xray X4, ku ta konsiderá un di e mihó i mas modèrno outonan di kareda na mundu awor.
"E kompetensia na Kòrsou semper ta fuerte, pero ku e Xray X4 nos tin un base sólido" su tim a deklará. "Nos fokus prinsipal durante entrenamentu lo ta pa haña e balansa i e grip perfekto riba e asfalto di CAS Grandi. E meta ta simpel: lucha pa un lugá riba podio i hasi Boneiru orguyoso."
Skema di Evento
E akshon riba pista riba djadumingu, 7 di yüni, lo kuminsá pa 10:30 a.m. ku e kualifikashonnan, miéntras ku den atardi lo tin e finalnan yen di adrenalina. E karedanan lo dura te mas o ménos 5:00 p.m.
Banda di e 21.5T Stock Class, e fin di siman aki lo marka tambe e debut di e kategoria kompletamente nobo 17.5T FWD Stock Class, lokual ta garantisá mas espektákulo pa públiko.
CRCCDA ta invitá tur fanátiko di kareda i públiko en general pa bin apoya e koredernan na Sport Complex CAS Grandi (patras di ex-HIT 100.3 FM).