KRALENDIJK – E belero Boneriano Rocqui Martis a brinda un prestashon interesante durante Aruba International Regatta 2026. E belero, ku ta sali bou di e nòmber Pebble in Motion, a terminá komo di dos den e klasifikashon general di kategoria Sunfish.
Pa Martis e resultado ta nifiká un stap grandi padilanti. Durante e mésun regata un aña pasá el a finalisá den e regionnan mas abou di e standing. E di dos lugá segun e ta resultado di trabou duru di un aña largu, treinennan intensivo i perseveransia.
"Pa ami esaki ta mas ku un lugá riba podio,” Martis ta bisa. “E ta mustra kuantu adelanto mi tabatin den un aña. Trabou duru, perseverá i keda konfia den e proseso ta hasi finalmente e diferensia.”
Martis ta gradisí su famia, spònser-, fanátiko- i amigunan pa nan sosten. Segun e nan a kontribuí ku un kontribushon importante na su desaroyo komo belero den kompetensia.
Banda di su ambishonnan deportivo Martis ke sigui duna di su banda pa sigui promové Boneiru internashonalmente ku su proyekto Pebble in Motion i hasi hóbennan entusiasmá pa e deporte di bela. E ta spera di demostrá ku su storia ku disiplina, perseveransia i pashon por krea oportunidatnan nobo.