KRALENDIJK – Sindikato AFBW a hasi un yamada na trahadónan den sektor di kuido na Boneiru, Sint Eustatius i Saba pa partisipá den un manifestashon pa pidi introdukshon di un siman di trabou di 36 ora, sin redukshon di salario ni penshun.
Segun AFBW, ta eksistí un diferensia ku no ta hustu, pasobra funshonarionan públiko kaba ta traha 36 ora pa siman, miéntras ku empleadónan den sektor di kuido ainda ta traha 40 ora. E sindikato ta bisa ku ta tempu pa e grupo di trahadónan akí haña e mesun rekonosementu i kondishonnan laboral.
E manifestashon lo tuma lugá riba 15 di ougùstù na 4:00 di atardi, ku saliendo for di Kas Sindikal AFBW na Kralendijk. AFBW ta pidi partisipantenan bisti blanku òf un shirt blanku komo símbolo di unidat.
Ademas di trahadónan, AFBW ta invitá famia, amigunan i otro hende ku ta sostené e akshon pa tuma parti den e manifestashon. Segun e organisashon, e akshon ta dirigí na logra kondishonnan laboral mas hustu i igualdat pa trahadónan den sektor di kuido riba e tres isla BES.