KRALENDIJK – Pa Maaike Krans e siguiente momento grandi ta yegando serka rápido despues di lunanan di treinen, kome severo i biba segun un skema rígido. E bodybuilder ku ta biba na Boneiru ta biaha pa Guatemala, kaminda e lo partisipá na nòmber di e isla na Central American and Caribbean Championships (CAC). Carlos Naranjo Caraballi i Jose Saleh tambe ta partisipá einan na nòmber di Boneiru.
Maaike Krans debe su partisipashon na e kompetensia di kualifikashon na Boneiru. E kompetensia ei ta importante pa selektá e mihó atletanan di e isla pa kampeonato internashonal. Aña pasá tal kompetensia di kualifikashon no por a sigui na Boneiru pa falta di partisipante. Maaike Krans i Carlos Naranjo Caraballi a representá e isla e ora ei direktamente riba nivel internashonal.
Pa Krans bodybuilding ta muchu mas ku pasa oranan den skol di deporte. Segun e e deporte ta drei rondó di e plachi kompleto. Hurado no ta wak solamente múskulo i figura di kurpa, pero tambe e manera ku un atleta ta presentá su mes, ta modelá, ta mustra konfiansa den su mes i asta e vestuario. “No ta presisamente ku e persona mas muskular tambe ta gana mesora”, e ta splika.
Maaike Krans mes a kuminsá trein na 2023 bou di guia di su coach Alison Maria. Despues numa a lanta e idea pa bai kompetensianan realmente. “Si nos bai hasi esaki, nos ta bai realmente 200 porshento p’e”, su entrenadó a bis’é. El a tuma e aktitut ei.
Un dieta rígido
Esei ta nifiká hopi sakrifisio tambe. Aña pasá segun Maaike Krans mes ta bisa e tabata djes luna riba un dieta rígido, e aña aki mas o ménos mei aña. E no ta bebe alkohòl, apénas e ta sali i ta pisa su kuminda rigorosamente te e último gram. Soño i rekuperashon ta hunga un ròl grandi. “Hendenan ta pensa: mas bo trein, mihó. Pero esei apsolútamente no ta bèrdat.”
Ademas e preparashon ta kuminsá tempran riba un dia. Maaike Krans ta konta ku durante su preparashon e ta lanta 5.15 or’ kaba pa bai skol di deporte. “Bo mester hasi algu p’e.”
Mas seshon
Tin un test internashonal grandi ta ward’é di nobo na Guatemala. Krans ta partisipá e aña aki den diferente seshon. Banda di Bikini Fitness e ta sali tambe den Masters, pasobra entretantu e tin 35 aña. Tambe e ta partisipá pa promé biaha na Fit Model, un parti ku segun e ta mas un elekshon di miss i kaminda ta bisti un shimis ku ta spesialmente diseñá.
Despues di su eksperensia internashonal di aña pasá Krans ta sinti ku el a bolbe dal stapnan. “Awor ta di wak kon nos ta pará na Guatemala, si nos por partisipá einan ku esnan den tòp, òf si tin mas trabou pa hasi.”
Maaike Krans ta enfatisá ku partisipashon di atletanan Boneriano no ta di mes. BBFA, e federashon di bodybuilding na Boneiru i diferente spònser tambe a hasi e biahe pa e kompetensia CAC posibel. “Sin nan nos lo no a haña e oportunidat aki”, Krans ta bisa.
Mentalmente pisá
Fuera di Maaike Krans i Carlos Naranjo Caraballi Jose Saleh tambe ta partisipá na nòmber di Boneiru na e kompetensia na Guatemala. Maaike Krans ta spera ku partisipashon na kampeonatonan internashonal lo yuda tambe pa engrandesé bodybuilding na Boneiru. Promé ku corona e deporte tabata visiblemente mas popular riba e isla segun Krans. P’esei e federashon i atletanan konserní ke hasi generashonnan mas hóben entusiasmá.
Pa esun ku ta konsiderá pa tuma e deporte na serio, Maaike Krans tin ún mensahe kla. “Si bo ta bai p’e, bo mester bai di bèrdat 200 porshento p’e si.” Segun Krans bodybuilding ta pisá físikamente, pero spesialmente mental tambe. Hustamente p’esei e deporte a siñ’é hopi. “Bo ta siña di bèrdat ku bo ta mas fuerte ku bo ta pensa. I bo ta siña disiplina di berdat.”