KRALENDIJK – Na kaminda pa Dia di Boneiru dia 6 di sèptèmber Entidat Públiko Boneiru ta organisá diferente aktividat pa nos komunidat huntu ku SKAL (Sekshon di Kultura, Arte i Literatura). For di 31 di ougùstùs te ku 4 di sèptèmber públiko por partisipá na karaoke, un anochi ku pelíkula, ‘Sip & Paint’ i ‘Sunset Jam’.
Ku e lema ‘Protehando nos isla’, nos ta pone atenshon na tur loke ta hasi Boneiru úniko. Protehá nos isla ta nifiká tambe protehá nos idioma, nos kultura, nos arte i nos músika. Ku e aktividatnan akí e organisashon ta trese nos habitantenan huntu i di antemano krea ambiente pa e selebrashon dia 6 di sèptèmber.
Tur aktividat ta grátis i ta tuma lugá na SKAL, situá na Kaya N.E. Craane 34. E programa ta konsistí di:
31 di ougùstùs | Karaoke na papiamentu: 19.00 te 21.00 or
-
2 di sèptèmber | Pelíkula Nos Eskudo: 19.00 te 20.00 or i 20.30 te 21.30 or
-
3 di sèptèmber | Sip & Paint: 19.00 te 21.00 or
-
4 di sèptèmber | Sunset Jam: 19.00 te 21.30 or
Pa partisipashon ta nesesario pa registrá adelantá i e kantidat di lugá ta limitá. Por haña mas informashon i e lenknan pa inskripshon riba www.bonairegov.com òf riba página di Facebook di Entidat Públiko Boneiru.