KRALENDIJK – BJJ Boneiru a tene djaluna 5 di òktober e promé èksamen ofisial pa e grupo Kids di BJJ. E partisipantenan hóben a haña e oportunidat durante e èksamen pa demostrá loke nan a siña e periodo ku a transkurí durante e entrenamentunan.
Durante e èksamen a evaluá diferente téknika i abilidat. Apesar di e tenshon salú e muchanan a sa di demostrá ku nan a desaroyá e tempu ku a pasa i a traha duru, segun BJJ Boneiru.
“Tabata fantástiko pa mira kuantu e muchanan a siña i kuantu nan a krese”, segun BJJ Boneiru. “Nos ta sumamente orguyoso di kada un di nan. Pa nos e èksamen aki no ta solamente un momento pa mustra téknikanan, pero spesialmente pa selebrá e desaroyo, dedikashon i perseveransia di e muchanan.”
E programa Kids BJJ no ta dirigí solamente riba Brazilian Jiu-Jitsu, pero tambe riba abilidatnan ku fuera di esei ta importante. Durante e lèsnan ta dediká atenshon na entre otro disiplina, konfiansa den su mes, rèspèt i traha huntu.
Ku esaki e èksamen tabata un promé stap ofisial den nan desaroyo den e deporte. Despues di e èksamen e entrenamentunan ta sigui i e partisipantenan por prepará nan mes riba un siguiente èksamen
BJJ Boneiru tin entrenamentu di Brazilian Jiu-Jitsu pa tantu mucha komo adulto na Boneiru. Durante entrenamentu, rèspèt, plèizí i desaroyo personal ta para sentral.