KRALENDIJK – Entrante djaweps 15 di òktober empresarionan na Boneiru por bini huntu atrobe tur luna durante un enkuentro di ret fiho. E promé edishon di The Business Club Bonaire ta tuma lugá na HYPE Beach Club, e anterior Spice Beach, di 17.00 or’ te 20.00 or’. Entrada ta grátis, pero mester registrá adelantá.
Ku e inisiativa aki e brindis di empresario mensual ta bèk atrobe riba djaweps, un tradishon ku a para na 2020. Segun e organisashon e meta ta pa ofresé empresarionan i trahadónan outónomo un sitio fiho riba e isla pa topa otro, interkambiá eksperensia i krea kontaktonan di negoshi.
Paulo Allee, direktor di IM&D B.V. i Marcel van der Hoek, direktor di Acumen B.V. i representante di benta na ofisina di mákelar RE/MAX Paradise Homes, ta organisá e enkuentro.
Durante e promé edishon sera konosí den un ambiente informal kantu di playa ta sentral. Tantu empresarionan establesé komo prinsipantenan ta bonbiní. Bishitantenan por kana drenta kada momento di e anochi, nan so òf huntu ku un kolega òf akompañante.
Registrá adelantá
E kantidat di kupo pa e promé edishon ta limitá. Por registrá via e website di The Business Club Bonaire. Esun ku bini ku un akompañante, mester partisipá esei na momento di registrá.
Despues di e lansamentu ta sigui tur luna un edishon nobo. Empresanan lokal ta haña e posibilidat na e siguiente enkuentronan pa organisá òf spònser un anochi i presentá nan aktividatnan na otro empresarionan.