KRALENDIJK – Emprendementu den e sektor kultural i kreativo por kontribuí mas na desaroyo ekonómiko di Boneiru. Pa logra esaki, Qredits Boneiru, Platform ACCT i Cultuur + Ondernemen ta uni forsa pa yuda artista, kreadó i otro empresario kreativo desaroyá nan talento den un manera mas profeshonal i sostenibel.
Segun e organisashonnan, e sektor kultural i kreativo no solamente ta importante pa bida kultural di Boneiru, sino tambe ta krea oportunidatnan den turismo, eventonan, enseñansa i servisio empresarial. P’esei ta importante pa kreadonan no solamente desaroyá nan talento, sino tambe haña konosementu riba emprendementu, merkadeo, finansa i maneho di empresa.
Pa sostené esaki, ta ofresé entrenamentu, guia i posibilidatnan di finansiamentu. Entre otro, dos edishon di Qreative Business Academy a tuma lugá, mientras empresarionan kultural i kreativo na Boneiru, Saba i Sint Eustatius por hasi uso di BES-Cultuurlening pa invertí den nan empresa.
Stimulá empresa sostenibel
E meta ta pa mas kreadó por transformá nan talento den un empresa sostenibel. Segun e organisashonnan, un sektor kreativo mas fuerte por stimulá inovashon, krea mas oportunidat ekonómiko i alabes fortalesé identidat kultural di Boneiru.