KRALENDIJK- Tourism Corporation Bonaire (TCB) ta lansa un inisiativa nobo yamá “Cruise-to-Stay”. Intenshon di e kampaña akí ta pa haña konosementu mas profundo i strukturalmente supstansiá den komportashon i motivashon di pasaheronan krusero i den loke nan ta gasta na nos isla, ku e meta final pa konbertí pasaheronan krusero den bishitantenan stayover pa un estadia mas largu.
Den kuadro di e inisiativa akí a invitá pasaheronan krusero pa durante òf despues di nan bishita, yena un enkuesta kòrtiku. Komo un estímulo adishonal, e partisipantenan tin chèns di gana un biahe ida i buèlta pa Boneiru, di manera ku nan por eksperensiá nos isla komo un bishitante di estadia.
“E inisiativa di ‘Cruise-to-Stay” ta nifiká un kambio den e manera ku nos ta aserká nos segmento di turismo krusero,” segun Elesiër Angel, direktor di TCB. “Pa medio di forma un brùg entre un bishita di un dia i un estadia di un siman, nos no ta solamente fortifiká nos konosementu impulsá pa dato den turismo krusero, pero nos ta invitá nos bishitantenan direktamente tambe pa forma parti di e storia di Boneiru. Nos meta ta pa konbertí e pasahero krusero di awe, den un fiel embahador stayover di mañan.”
TCB ta ehekutá e inisiativa akí den kolaborashon ku Delfins Beach Resort, Caribe Car Rental i Blue Bay Bonaire. E kolaborashon akí ta yuda krea un eksperensia di premio atraktivo i kompleto.
Ganadó
Dia 12 di yanüari 2027 lo anunsiá e promé ganadó. E pakete di premio ta enserá un buelo ida i buèlta pa dos persona, un estadia di shete anochi, transporte na nos isla i un eksperensia eksklusivo di un trep riba boto di bela, kombiná ku snòrkelmentu i un sena riba laman.