KRALENDIJK – Tourism Corporation Bonaire (TCB), den kolaborashon ku Carnival Horizon, Ofisina di Haf di Boneiru i Buki di Prèt, a organisá ‘Bonaire Cruise Adventure for Kids’ , duna un grupo di mucha di Boneiru e oportunidat pa bishitá i deskubrí bida riba un barku krusero.
Durante e bishita, e muchanan a eksplorá diferente parti di e barku, a siña tokante e operashonnan di turismo krusero i a disfrutá di un dia edukativo ku tambe tabata yen di dibertishon.
Pòtret: TCB
Direktor di TCB, Elesiër Angel, a bisa ku e inisiativa ta mustra kon turismo por benefisiá tambe e komunidat lokal, duna muchanan un eksperensia úniko ku hopi di nan posiblemente no lo tabatin e oportunidat di biba otro manera.
Carnival Horizon a risibí e grupo na bordo ku un programa spesial, inkluyendo un rekorido bou di guia i un lùnch. Siguridat i bienestar di e muchanan a keda e promé prioridat durante henter e evento.
Pòtret: EPB
Relashon ku komunidat lokal
Segun TCB, inisiativanan manera esaki ta yuda fortifiká e relashon entre turismo i e komunidat lokal, stimulando enseñansa, konsientisashon i eksperensianan kompartí.