KRALENDIJK – Dos kasino na Boneiru, Divi Flamingo Beach Resort & Casino i Coral Casino Plaza Resort Bonaire a kuminsá algun tempu kaba ku registrá i identifiká hungadónan mas severo. Ta pidi bishitantenan pa mustra un prueba di identifikashon i den algun kaso di suministrá datonan personal adishonal.
Na Divi Flamingo Beach Resort & Casino a pidi bishitantenan pa entregá un sédula òf pasport pa kòntròl. Tambe a pidi informashon di adrès. Segun un splikashon di e gerente di e kasino por pidi tambe un deklarashon di fuente di entrada. Segun e kasino e aserkamentu aki ta nesesario den kuadro di reglanan mas severo pa evitá labamentu di plaka.
Den e kasino tin ademas un partisipashon kologá kaminda tin pará ku entrante 31 di òktober 2025 bishitantenan mester ta miembro obligatorio di Player’s Club i mester mustra un prueba di identidat bálido ku pòtrèt na entrada. Segun e anunsio miembronan eksistente mester mustra solamente nan karchi di miembro na momento ku nan datonan di identidat ta den e sistema kaba.
Kiko ta sosodé ku e datonan?
Na Coral Casino Plaza Resort Bonaire a kontrolá pasport òf sédula na entrada. A saka mesora un kopia, pero hungadónan a haña si e posibilidat pa registrá nan mes. Segun e bishitantenan no a splika kla kiko ta sosodé ku e datonan ku nan a kolektá, kon largu ta warda nan i kon ta warda i usa nan.
Preukupashon pa protekshon di dato
E desaroyonan ta bini na un momento ku siguridat di datonan tin atenshon èkstra na Boneiru. Anteriormente e luna aki a hasi notifikashon di un lèkmentu di dato na Scholengemeenschap Bonaire kaminda a hòrta dato. No ta konosí ainda kiko a horta i kuanto dato a afektá. Luna pasá tabatin tambe un lèkmentu di dato na Hulanda Europeo serka e kompania di telekomunikashon Odido. For di e dia ei hackernan ta plama diariamente datonan personal di klientenan manera numbernan di kuenta di banko, pasport, adrès di email i kontraseña di klientenan.
Kiko por legalmente i kiko no por?
Sakamentu di un kopia di un prueba di identidat segun regla ta solamente pèrmití ora esei ta nesesario. Pa kasinonan esaki por ta hustifiká ora di identifiká hungadónan, kòntròl riba labamentu di plaka, kumplimentu ku prohibishon di akseso òf registro di adikshon, i na momento di pago òf kuentanan VIP spesial. Na mes momento no ta pèrmtí pa warda kopianan standart di pruebanan di identifikashon sin motibu kla.
Na momento ku un kasino traha un kopia, e kompania mester splika kla pakiko esaki ta nesesario. Banda di esei tin mag di prosesá solamente datonan nesesario, mester protehá kopianan bon i no mag warda datonan mas largu ku ta nesesario. Mester informá bishitantenan ademas di e manera ku ta usa i warda nan datonan.
Inseguridat serka bishitantenan
Bishitantenan ta indiká ku nan no ta risibí tur ora sufisiente splikashon di e meta di e prosesamentu di datonan. Pa e motibu aki ta surgi pregunta tokanta transparensia i privasidat. No ta konfirmá ofisialmente si e kòntrolnan intensifiká ta parti di reglanan lokal òf internashonal nobo.