KRALENDIJK – Ni un siman despues ku Direktorado di Supervishon i Mantenshon a kuminsá parti stekernan di atvertensia pa vehíkulonan ku ta mal stashoná, e promé kehonan ta drenta. No pa loke ta trata e mantenshon, sino di e stekernan ku ta plak riba e bentananan di outo. Segun diferente outomobilista ta difísil pa kita esakinan i rasgo di leim ta keda atras.
Un shofùr ku resientemente a haña un steker riba su outo, ta bisa yuist ku e ta sostené e akshon di Direktorado di Supervishon i Mantenshon. “Mi ta 100% di akuerdo ku ta informá personanan ku nan ta mal stashoná.”
E frustrashon sinembargo ta den e ehekushon segun e persona. Ora di kita e steker e ta sker, di moda ku tin parti ta keda atras riba e benta. “Kasi bo no por kit’é for di e benta.”
Un otro habitante a indiká ku un dje dianan aki e ta bai bishitá Direktorado di Supervishon i Mantenshon.
Alternativa
Segun e shofùr un atvertensia bou di e waiper por ta un alternativa mas práktiko.
E kehonan ta kondusí na preguntanan hurídiko tambe. Direktorado di Supervishon i Mantenshon a usa den pasado stekernan similar riba bibiendanan partikular. E tempu ei un abogado den un kombersashon ku Bonaire.nu a pone interogatorio tras di e prosedimentu aki. “E punto di salida ta ku bo no tin mag di mishi sin mas ku propiedat di un hende. Plak steker riba un porta òf buzon en realidat ta un violashon, pa chikitu ku e por ta.”
Segun e hurista mester eksistí un base legal bon kla. El a enfatisá e tempu ei si ku e no a hasi un investigashon profundo di e lei i ku p’esei e no por duna un huisio definitivo di legalidat di e práktika.