DEN HAAG – E ampliashon di e kantidat di miembronan di konseho insular i diputadonan na Boneiru, Sint Eustatius i Saba ta kore menasa ku ta posponé pa kuater aña si Eerste Kamer no trata e proposishon di lei pa mas tardá na luna di òktober. Sekretario di estado Eric van der Burg di Asuntunan Interno i Relashonnan di Reino a pidi senado pa finalisá e tratamentu ku urgensia.
Tweede Kamer a aprobá 9 di yüni e proposishon di lei, ku mester oumentá e kantidat di miembronan di konsehonan insular i kolegionan ehekutivo riba e tres islanan BES gradualmente. Segun Van der Burg ta preferibel ku Eerste Kamer ta trata e proposishon na sèptèmber, di moda ku ruim promé ku elekshonnan di konseho insular na mart 2027 ta konosí kuantu asiento ta disponibel.
Konsekuensianan grandi
Sekretario di estado ta atvertí ku posponementu tin konsekuensianan grandi. Si e lei no por drenta na vigor na tempu, por implementá e ampliashon despues di e siguiente elekshonnan na 2031 numa. Esei lo nifiká ku refuerso di representashon i forsa gubernamental na Boneiru, Sint Eustatius i Saba tin un retraso di kuater aña.
Van der Burg ta mustra ku implementashon di e lei en todo kaso ta un trayekto largu kaba, pasobra oumento di e kantidat di konsehal i diputado ta tuma lugá gradualmente. P’esei e ta haña importante ku e entidatnan públiko, partidonan polítiko i potensial kandidatonan ta na altura hopi promé ku elekshon unda nan ta pará.
Si resultá ku tratamentu na luna di sèptèmber no ta alkansabel, e sekretario di estado ta pidi Eerste Kamer pa finalisá e tratamentu en todo kaso pa mas tardá 27 di òktober 2026. E ora ei so ta eksistí e posibilidat pa laga e kambio di lei drenta na vigor pa elekshonnan di mart 2027.