KRALENDIJK – Dos sitio di buseo popular na Klein Bonaire ta será temporalmente e fin di siman aki. Stinapa a sera ‘Lighthouse’ i ‘Something Special’ di djabièrnè 12 di yüni 6’or di atardi te djaluna 15 di yüni 6’or di mainta pa motibu di un aktividat akuatiko ku diferente sorto di boto.
A tuma e medida pa garantisá seguridat di tur partisipante i prevení posibel konfliktonan riba awa.
Kiters na No Name Beach
Tambe tin un kompetensia di kitesurf djadumingu 14 di yüni kaminda partisipantenan ta aterisá ku nan kite na No Name Beach na Klein Bonaire. Bishitantenan di e isla por fèrwagt kiternan riba bich entre 9’or i 12’or di mainta.
Normalmente práktika di kitesurf ta prohibí na Klein Bonaire. Parke Marino di Stinapa a hasi un eksepshon pa e evento aki.
Stinapa ta hasi un yamada riba bishitantenan pa tene kuenta ku e aktividatnan.