KRALENDIJK- Diaweps último, RoffaReefs i Diergaarde Blijdorp a lansa e plataforma internashonal eggspedition.org. E plataforma ta kolektá diferente imágen di webu di piská pa asina por haña mas informashon tokante reprodukshon di piská, refnan di koral i salú di nos laman. Wereld Natuur Fonds (WWF-NL) a forma parti di e proyekto for di kuminsamentu i ta enfatisá e urgensia di kolaborashon pa asina garantisá e futuro di poblashon di piská i refnan di koral.
RoffaReefs a kuminsá sinku aña pasá den Oceanium di Diergaarde Blijdorp i awor ta un aktor serio den e área di restourashon di naturalesa. E organisashon ta dediká su mes na salbá koral dor di kria piská. E método ku ta éksitoso na Boneiru, ta kumpli sinku aña e aña akí i ta forma parti di Diergaarde Blijdorp. Riba e wèpsait eggspedition.org, sientífikonan, sambuyadónan, hende ku ta snòrkel, piskadónan i instituto di investigashon di tur parti di mundu por agregá i kolektá datonan tokante reprodukshon di piská.
Dato pa mehor protekshon di laman
Danki na e plataforma, sientífikonan por haña un mihó bista di e poblashon i kantidat di piská, i piskadónan, sambuyadónan i investigadónan por siña wak e laman di un forma diferente. “Refnan di koral a bai atras durante hopi aña kaba. Koral ta un organismo bibu ku ta dependé di e piskánan ku ta mantené. Debí na e dekadanan di piska eksesivo, kambio di klima i polushon, hopi lugá rònt mundu tin ménos piská pa sostené i permití pa e refnan floresé. Esaki tin konsekuensianan serio” sigun fundadó di RoffaReefs, Sander van Lopik.
Pòtret: WWF
Kria webu di piská
Mas o ménos 80% di tur piská den laman ta reprodusí di e forma pelágiko. Esaki ta nifiká ku nan webunan, ku hopi biaha no ta mas grandi ku mitar milimeter, ta drif ku koriente for di e momentu ku fertilisashon ta tuma lugá. RoffaReefs ta dediká su mes na haña e webunan akí, dokumentá nan, kria nan i despues pone nan serka di e refnan di koral. Danki na e método akí, e piskánan hubenil, i tambe e koralnan ku nan ta yuda mantené, tin un mihó oportunidat di sobrebibiensia.
“Ku eggspedition.org nos ta dokumentá tur esaki ku hopi kuido. Sea ku bo ta sambuyá, piska òf bo ta un sientífiko, bo por agregá bo propio observashon i asina kontribuí na laman yen di bida di piská atrobe” Van Lopik ta konta ku orguyo.
Kolaborashon ku WWF-NL
WWF-NL ta partner for di e promé ora i ta traha huntu ku RoffaReefs pa restourá refnan di kkoral i poblashon di piská rònt mundu. “Loke ta hasi e plataforma akí asina fuerte ta ku e ta reuní konosementu di diferente usuarionan i ta hasi e informashon aplikabel mesora pa restourashon di naturalesa. Un mihó komprondementu di unda i ki ora piská ta reprodusí ta esensial pa por traha di forma direkto riba restourashon di e ekosistema kompleto, manteniendo refnan di koral salú i resistente” ta bisa Arjan de Groene, eksperto di Karibe na WWF-NL.