KRALENDIJK – Un testigu kompletamente anónimo menasá ta hunga un papel importante den e kaso penal Galápagos. E identidat di e persona aki ta asina hopi protehá ku asta e fiskal ku ta embolbí den e kaso no sa ken e testigu ta. Na final e deklarashon por pisa hopi na momento di e pregunta ken por tene responsabel pa morto di Clayshenou D. di 15 aña.
Ta denominá e testigu den e archivo penal komo testigu X. Segun Ministerio Públiko (OM) e persona aki a deklará ku e tabata presente durante e tiroteo na Club Rush i a mira ken a tira den direkshon di e víktima.
E testigu a deklará ku tantu Jermaine W. komo Gedion O. lo a tira riba Clayshenou. Despues di un tiru di Jermaine W. e víktima lo a bai suela.
Prosedura spesial
A sigui un prosedura spesial pa e deklarashon. Rishèrshi lokal no a tende e testigu na e manera di kustumber, pero a bai kai den un trayekto spesial pa testigunan menasá.
Pa esaki tin entre otro un tim spesial embolbí ku mester evaluá si un hende bèrdaderamente ta kore peliger i si anonimidat ta nesesario. Un hues komisario tambe ta kontrolá e prosedura
Despues ta protehá su identidat kompletamente. Segun e fiskal no ta pa defensa so ta deskonosí ken testigu X ta, pero pa polis, Ministerio Públiko i asta hues tambe. Asta e género di e testigu no ta konosí serka e fiskal ku ta okupá ku e kaso.
Abogadonan i Ministerio Públiko por a entregá pregunta si serka Hues Komisario. Ta hasi e preguntanan e ora ei na e testigu na un sitio sekreto. Einan ta traha un prosèsverbal. No a kontestá sierto pregunta na momento ku e kontesta posiblemente por a revelá algu di identidat di e testigu.
Kon testiguá anónimo ta funshoná?
Personanan ku tin informashon di krímennan serio, pero ku tin miedu pa nan seguridat, por tuma kontakto via e liña di tep anónimo di polis. Nan por indiká ku nan tin informashon, pero ke koperá solamente si protehá nan identidat.
E Tim di Informashonnan Kríminal (TCI) por investigá e informashon seguidamente i pas’é pa polis sin menshoná e identidat di e dunadó di tep. Segun fiskal no ta lokalisá numbernan di telefon. Si un persona ke funshoná komo testigu anónimo menasá, ta sigui un trayekto mas amplio. Un tim speshalisá ta hiba kòmbersashon ku e persona, ta kontrolá e informashon i ta investigá si e identidat bèrdaderamente por keda sekreto.
Esei no ta fásil tur ora. Si ta e dunadó di tep so sa di sierto informashon, por rekonosé esei ainda na kontenido di e deklarashon. Ministerio Públiko ta spera ku ta usa e posibilidat aki mas biaha den futuro na Boneiru, di moda ku testigunan ku ta keda ketu pa motibu di miedu por kompartí informashon importante tambe den otro kasonan penal.
‘Nos a mat’é’
E deklarashon di testigu X ta bai mas leu segun Ministerio Públiko ku loke lo a mira durante e tiroteo.
E testigu ta bisa di tabata presente tambe na un kòmbersashon kaminda Jermaine W. i Gedion O. tabata presente. Jermaine W. lo a bisa einan segun e testigu: “Nos a mat’é, mi ta bai Hulanda.”
Pa OM esei ta un parti importante di e konstrukshon di prueba kontra e dos sospechosonan.
Na mes momento no ta disidí ainda kuantu peso e hues lo duna finalmente na e deklarashon. E defensa ta bisa ku testigu X no ta konfiabel i ku tin muchu hopi inklaridat i pidanan di pùzel ku falta den e dosié. Tambe ta kuestioná ku por prueba sufisiente si ámbos sospechoso bèrdaderamnete tabata koperá huntu.
No sufisiente asina sin mas pa sentensia
No por usa un deklarashon di testigu anónimo sin mas komo úniko prueba pa un sentensia. Tribunal mester evaluá entre otro si e deklarashon ta konfiabel i si e ta haña sosten den otro medionan di prueba.
Hustamente esei ta bira segun e fiskal un di e preguntanan hurídiko importante den Galápagos. Si hues ta haña e deklarashon di testigu X konfiabel i e ta pas huntu ku otro medionan di prueba di e dosié, e por hunga un papel importante den e konstrukshon di prueba. Si hala e deklarashon un banda, esei por tin konsekuensia grandi pa e posishon di prueba di OM.
Miedu pa papia
E prosedura spesial ta mishi segun e fiskal tambe ku un problema mas amplio na Boneiru: e reservá ku testigunan ta pa papia ku polis i hustisia.
Hopi hende lo tin miedu ku finalmente nan identidat lo bira konosí tog. Segun e fiskal tin tiki konfiansa serka sierto habitante ku polis i OM realmente por garantisá nan anonimidat.
“Hopi hende akinan tin miedu konstantemente, no ke deklará i no tin konfiansa tampoko ku nan anonimidat ta keda sekreto di bèrdat”, e ta bisa.
Riba un isla chikitu ta sosodé ku hendenan konosé otro, ta famia di otro òf ta move den e mésun sírkulo sosial.
Posiblemente importante pa kasonan den futuro
P’esei e resultado di Galápagos por yega mas leu ku e kaso penal aki so.
Si korte haña ku por usa e deklarashon di testigu X i e deklarashon finalmente kontribuí na un kondena, e fiskal ta spera ku mas hende ta riska hasi uso di e prosedura aki den kasonan penal pisá den futuro.
Segun e fiskal esei por bira un posibilidat di investigashon importante den kasonan kaminda testigunan tin informashon si, pero pa miedu no ke deklará abiertamente.
Pero lo kontrario tambe ta e kaso. Ora e deklarashon finalmente ta haña tiki nifikashon den e sentensia, e ta teme ku e ruta aki ta bolbe disparsé den fondo atrobe na Boneiru.
“E por muri un morto ketu gewon asina tambe”, segun e fiskal.
Sentensia den kaso Galápagos lo ta riba djamars 27 di òktober.
Bo ke sa mas di e kaso aki of bo tin informashon ku por yuda solushoná krímennan na Boneiru? Bo ke kompartí bo storia, eventualmente bou di kondishonnan di konfiabilidat? Tuma kontakto e ora ei ku redakshon via info@abconlinemedia.com. Menshoná den bo promé mensahe solamente kon nos por yega seif serka bo i no kompartí informashon delikado ainda si bo ta duda di bo anonimidat.