DEN HAAG – Miembronan di Tweede Kamer Tseggai i Dassen ke pa gabinete investigá kua fasilidatnan públiko mester di mehoransa struktural na Karibe Hulandes e próksimo añanan. Tambe mester bira opvio kon por paga e invershonnan nesesario, sin ku mester usa sen ku ta destiná pa seguridat di eksistensia pa esei.
E dos miembronan di Kamer a entregá dia 8 di òktober un moshon pa esei durante tratamentu di presupuesto pa Relashonnan di Reino i fondo BES pa 2027
Segun e proponentenan tin ainda diferensianan grandi entre fasilidatnan públiko importante na Hulanda Europeo i Karibe Hulandes. Pa oumentá igualdat entre ámbos parti di Reino, nan ta haña ku mester invertí den fasilidatnan na Boneiru, Sint Eustatius i Saba.
Den e moshon ta supliká gobièrnu pa identifiká kua ta e fasilidatnan ku mester di mehoransa struktural e añanan benidero. Tambe mester hasi komprendibel kon por finansiá e mehorashonnan aki,
E proponentenan ta mustra ku gabinete ta reservá 30 mion euro èkstra pa seguridat di eksistensia na Karibe Hulandes. Segun e moshon e invershonnan nesesario den fasilidatnan públiko no mag bai a kosta di e sèn aki.
Bishita di Tweede Kamer na Boneiru
E moshon ta bini na un momento ku e simannan benidero tin bishitanan planiá for di Den Haag pa Boneiru. Komishon fiho pa Relashonnan di Reino di Tweede Kamer ta hasi un bishita di trabou na e islanan riba 22 i 23 di òktober. E bishita di trabou na Aruba, Boneiru i Kòrsou ta riba agènda di e komishon.
Anteriormente, riba 13 i 14 di òktober, sekretario di estado Eric van der Burg di Relashonnan di Reino ta hasi un bishita na Boneiru. E ta papia entre otro ku gezaghebber John Soliano i Kolegio Ehekutivo.
Den e moshon ta pidi pa un inventarisashon i un plan di finansiamentu. No ta papia di fasilidatnan konkreto ainda ni tampoko di montantenan spesífiko pa Boneiru. Tweede Kamer a vota 13 di òktober riba e moshonnan ku a entregá.