KRALENDIJK – Tourism Corporation Bonaire (TCB) a otorgá e rekonosementu ‘Bonaire Friends’ pa luna di sèptèmber 2026 na Johan van Blerk, Everon ‘Tonky’ Frans i Nella Martinus. E tres personanan a keda nominá pa bishitantenan ku a eksperensiá nan hospitalidat i dedikashon durante nan estadia na Boneiru.
Johan van Blerk, fundadó di Terra Barra Native Garden, a keda nominá pa Dirk Vink di Hulanda. Durante un bishita, Vink i su yu hòmber a keda impreshoná pa e trabou di Van Blerk i su boluntarionan pa restorá vegetashon endémiko i hasi Boneiru mas bèrdè.
Pòtret: TCB Everon ‘Tonky’ Frans, instruktor di windsurf na Dunkerbeck Pro Center na Sorobon, a risibí su nominashon di Bo van der Pijl di Hulanda. Su amabilidat i manera entusiasta di introducí miembronan di e famia na windsurf a kontribuí na un eksperensia positivo durante nan vakansi.
Nella Martinus, ku ta traha na Divi Flamingo Beach Resort, a keda nominá pa Miranda Romney di Hulanda. Durante su promé bishita na Boneiru, Romney a risibí rekomendashonnan di Martinus tokante kultura lokal i lugánan ménos konosí. Nan a mantené kontakto despues di e bishita.
Pòtret: TCB Segun direktor di TCB, Elesiër Angel, e tres personanan ta ilustrá e papel importante ku habitantenan lokal ta hunga den e eksperensia di bishitantenan.
Ku e inisiativa ‘Bonaire Friends’, TCB ta duna rekonosementu na personanan ku, segun eksperensianan di turistanan, ta kontribuí positivamente na sektor turístiko di Boneiru.