KRALENDIJK – Mientras ku hopi mucha na Boneiru tabata disfrutá di fakansi di Regatta, diesinku alumno di habla spaño a bai skol ekstra durante un siman. Durante e Summerschool di Stichting Lezen en Schrijven Bonaire, nan a traha riba nan abilidatnan den idioma hulandes, pero tabatin sufisiente espasio tambe pa relahá i pasa dushi.
E alumnonan di Internationale Schakelklas (ISK) a praktiká prinsipalmente lesa, papia i komprondé hulandes entre 12 i 16 di òktober. Pa muchanan ku no ta biba muchu tempu ainda na Boneiru, idioma hulandes ta representá un reto grandi. Un bon dominio di e idioma ta importante pa nan por sigui e lèsnan na Scholengemeenschap Bonaire (SGB), kaminda hopi di e lèsnan ta wordu duná na hulandes.
Durante mainta e alumnonan a konsentrá riba gramátika i komprenshon di teksto. Den oranan di atardi tabatin aktividatnan di músika i arte. E muchanan a bai lama tambe i a hasi un bishita na Klein Bonaire, kaminda nan por a landa.
Progreso grandi den tempu kòrtiku
Segun e maestronan Julivien Sommer i Paul Ruijs, e muchanan a logra hasi progreso konsiderabel den poko tempu. Prinsipalmente e trabou den gruponan chikitu i e oportunidat pa praktiká papia hulandes frekuentemente a kontribuí na esaki. Tur dos maestro ta orguyoso di e esfuerso i resultadonan di e alumnonan.
Stichting Lezen en Schrijven Bonaire ta organisá aktividatnan di Summerschool durante fakansinan di skol pa mas di dies aña kaba. E aña aki nan a organisá e programa durante fakansi di Pasku, fakansi grandi i awor tambe durante fakansi di Regatta.
Summerschool tin su lokalidat fiho den Kas di Futuro na Kaya Mississippi 3. E aktividatnan ta posibel danki na donashonnan. E fundashon ta gradisí tur donadó i otro personanan ku ta kontribuí pa hasi e programa posibel.