KRALENDIJK – E seksion lokal nobo di Progressief Nederland (PRO) anteriormente GroenLinks/PvdA na Boneiru, ta organisá un reunion públiko riba djárason 28 di òktober tokante Europa i su importansia pa Boneiru. Durante e anochi lo papia tokante e oportunidatnan i posibel riesgonan ku desaroyonan na Europa por trese pa nos isla.
Entre otro, e parlamentario nan di Parlamento Oropeo Marit Maij i Mohammed Chahim lo partisipá na e reunion. Kenville Kleinmoedig, sekretario internashonal di PRO, lo ta presente tambe. Nan lo konta tokante nan trabou na Europa i interkambiá idea ku e presentenan tokante e posishon i interesnan di Boneiru.
Segun e organisadónan, e meta ta pa duna habitantenan mas informashon tokante desaroyonan na Europa i e oportunidatnan ku esakinan por ofresé Boneiru. E bishitantenan lo tin oportunidat pa hasi pregunta i partisipá na e diskushon.
E reunion lo tuma lugá na Kas di Futuro, na Kaya Mississippi 3 na Kralendijk. E programa ta kuminsá pa 19.00 or ku e fundashon ofisial di e seksion lokal di PRO. Pa 19.15 or e reunion temátiko lo kuminsá. Entrada ta grátis.