KRALENDIJK – For di djabièrnè 23 di òktober, preis di diesel na Boneiru lo subi ku 40 sènt di dòler pa liter. E preis ta subi di USD 1,32 pa USD 1,72 pa liter, un oumento di mas di 30 porsento. Entidat Públiko Boneiru (EPB) a anunsiá esaki.
Segun EPB, e oumento di preis ta konsekuensia di desaroyonan resien riba merkado internashonal i preisnan di kompra mas haltu pa kombustibel.
Gasolin i gas tambe ta bira mas karu
Preis di gasolin (Mogas95) ta subi ku 12 sènt di dòler pa liter, yegando na USD 1,76. E bòternan di gas grandi (100 liber) ta subi ku tres dòler, yegando na USD 57. E bòternan chikí (20 liber) ta subi ku un dòler, yegando na USD 12. Preis di kerosin ta keda meskos na USD 0,81 pa liter.
Na ougùstùs preisnan a baha ainda
E oumento ta sigui despues di un bahada di preis na luna di ougùstùs. Riba 28 di ougùstùs, preis di gasolin i diesel a baha ku seis sènt di dòler pa liter. Preis di bòter di gas tambe a baha e tempu ei, pero awor nan ta bolbe na nan preis anterior.
Diesel i gasolin ta bira mas karu ku promé ku e bahada di ougùstù. Na e momento ei, diesel tabata kosta USD 1,38 i gasolin USD 1,70 pa liter.
Konsekuensianan pa turismo i habitantenan Diesel ta un kombustibel importante pa trùknan, mashinnan di konstrukshon, bùsnan i barkunan. E oumento di preis por tin konsekuensianan tambe pa sektor turístiko, un di e pilarnan importante di ekonomia di Boneiru.
Skolnan di sambuyamentu ta usa barkunan ku ta kana riba diesel, miéntras ku empresanan di ekskurshon ta usa bùsnan. E gastunan mas haltu por reflehá den preisnan di ekskurshon, transporte i produkto di konsumo. Boneiru ta dependé pa kasi tur kos di importashon. Kombustibel mes tambe ta ser transportá for di Kòrsou.
Na mart di e aña aki, Kolegio Ehekutivo a atvertí kaba ku poder di kompra di habitantenan ta bou di preshon pa motibu di gastunan di transporte mas haltu. E kolegio a pidi Den Haag pa baha akseins riba gasolin i kambia e manera di kalkulá ABB.
Boneiru no por hasi e kambionan aki independientemente, pasobra e impuestonan ta stipulá den Belastingwet BES. For di e tabla di preisnan ta resultá ku ABB riba diesel tambe ta subi, di aproximadamente nuebe pa diesdos sènt di dòler pa liter.