WILLEMSTAD – Un turista a keda seriamente heridá despues ku dos kachó pitbull a atak’é na un tereno di konstrukshon na Piscadera. Ora ku polis a yega e kachónan a ranka sali riba e agentenan tambe.
Servisionan di emergensia a kore bai e tereno, kaminda tin aktividatnan di konstrukshon ta tuma lugá, despues di denunsianan di atake di kachó. Politur tambe a bini a e sitio pasobra ta trata di un turista. Na yegada nan a haña e turista mal heridá, ku a konta ku e kachónan pitbull a atak’é di patras i a keda morde te ora ku el a kai. E tabatin numeroso mordé rònt su kurpa.
Un di e kachónan a ataká un agente, ku a tira riba e kachó. E kachó a sobrebibí i a hib’é dòkter di bestia. A transportá e turista ku urgensia pa Curaçao Medical Center (CMC) pa tratamentu médiko. Segun un bosero di polis e ta keda hòspitalisá pa motibu di gravedat di su leshonnan.
E doño di e tereno tin vários kachó pitbull pa siguridat. Polis ta investigando kon e kachónan por a skapa. Segun e matutino Èxtra e turista tabata riba tereno públiko i no riba tereno privá.
Normalmente ta konfiská kachónan ku ta hui i ataká hende i hopi biaha ta pasa nan pa otro mundu ora ku nan a okashoná daño. No tin klaridat dikon esei no a sosodé den e kaso aki. Segun polis departamentu VVC, ku ta investigá delitunan, ta sigui investigá e kaso.
Remarkabel ta ku e kachónan pitbull por a bai bèk serka nan doño despues di e atake. Fiskal ta buskando informashon pa disidí kua ta e siguiente stapnan ku mester tuma. E investigashon ta andando ainda.