KRALENDIJK – E promé bùs di e sistema nobo di transporte públiko na Boneiru posiblemente por kuminsá kore kaba promé ku fin di yanüari 2027. Kolegio Ehekutivo ta trahando p’esei den un koperashon ku ABC Busbedrijf na Kòrsou. “Chèns ta grandi ku e bùs ta kuminsá kore promé ku fin di yanüari”, miembro di konseho insular Elvis Tjin Asjoe ta bisa.
No a bestèl e bùs mes ainda. Segun dipitado Dennis Martinus mester ta kla promé kon ta hinka e transporte públiko den otro. “Bo no por bestèl un bùs asina asina sin ku bo a definí bon kon grandi e bùs mester ta i kuantu stul e mester tin. I a base di e kalkulashon ei bo ta bai disidí e ruta. Kiko e ruta ta bira? Kiko e frekuensia ta?”
Segun Martinus a sali na kla ora el a asumí su funshon ku no tabatin un plan di invershon ku ta finansieramente i stratégikamente responsabel pa e transporte públiko. “A pone hopi kos riba papel, pero no tin un plan di invershon ku ta finansieramente i stratégikamente responsabel.” P’esei a buska partidonan ku tin eksperensia riba e otro islanan.
Kompania di Transporte ABC
Un delegashon di Boneiru a papia tokante esaki ku Kompania di Transporte ABC na Kòrsou i ku Arubus na Aruba. E preferensia ta bai pa Kòrsou. “Nan ta bai yuda nos promé ku skirbi un plan di invershon i banda di esei nan ta bai sostené nos pa introdusí transporte públiko poko poko aki nan”, Martinus ta bisa. E meta ta segun Martinus pa bai “di chikitu pa un transporte públiko ku ta operá hopi bon”.
Tjin Asjoe ta bisa ku ta traha riba un areglo di koperashon. Mester organisá esei riba un base ámplio. “Nos no ta bai inventá e wil”, e ta bisa. Segun Tjin A Sjoe Kòrsou por guia Boneiru ku kompra di e bùsnan i ku organisashon práktiko di e sistema.
Ainda e kompania di transporte públiko lo no ta kompleto
Kolegio Ehekutivo no ke warda te ora e kompania di transporte públiko ta kompletamente kla. “Nos no ta bai lanta un kompania i despues bai bestèl un bùs, pasobra e ora ei nos ta kuater òf sinku luna mas leu”, Tjin A Sjoe ta bisa. P’esei ta traha promé ku un fase di transishon.
Segun Tjin A Sjoe tin manera pa laga un bùs kore relativamente lihé. “Tin bùs na Kòrsou ku por manda aki nan”, a remarká durante e kòmbersashon. Kon ta ehekutá e fase di transishon ei presis, mester diskutí ainda ku Kompania di Transporte ABC.
Un gran parti di e trabou preparativo di rutanan ta hasí kaba segun Tjon A Sjoe. “E ruta kompleto ta kla kaba. A hasi hopi trabou. Solamente nos ta adaptando loke tin, huntu ku un kompania ku ta hasi esaki pa sesenta aña kaba.” E ta enfatisá ku kolegio ehekutivo ke partikularmente ehekutá: “No mas konsultadó, no mas plan, simplemente hasi.”
E intenshon ta ku e bùsnan ta pasa den diferente bario, ounke no ta yega na tur kas dirèkt. “Hendenan mester kana bai un parada di bùs si”, Tjin A Sjoe ta bisa.
Kuater bùs
Tambe ta wak e kombinashon di bus grandi i bùs chikí. Martinus ta mustra ku Kòrsou konosé ámbos sistema. E ambishon na Boneiru ta segun Martinus pa konektá nan mihó ku otro. “Nos ambishon ta ku nos ta inkorporá ámbos den e trabou aki.” Kòmbersashon ku operadónan di bùs chikitu mester kuminsá ainda.
Kuantu bùs finalmente lo bai tin mester no ta definitivo ainda. A pensa promé riba kuater bùs na kuminsamentu. Segun Tjin A Sjoe mester pone e sistema di tal manera riba pia “ku kresementu dinámiko ta posibel”.