KRALENDIJK – Katherine Montero ta un di e tres kandidatonan ku ta kompetí pa e título di Miss Boneiru. E elekshon ta nifiká un stap den un mundu kompletamente nobo pa e Boneriano di 24 aña. Komo karateka, Ranger di Parke Marino, mama i amante di bestia e ta mira e elekshon spesialmente komo un plataforma pa pidi atenshon pa loke ta mas importante p’e: bienestar di bestia i konservashon di naturalesa.
"Mi ta hasi esaki pa esnan ku no tin bos” Montero ta bisa. “Esei ta mi meta. Mi ke ta e bos pa bestianan, pa naturalesa i pa tur ku no tin bos. Be the Voice for the voiceless.”
Es ku topa ku Katherine, ta ripará hopi lihé ku su amor pa bestia ta profundamente ankrá. Ya na edat hóben e tabata sa kiko e ke bira. “For di chikí mi a bisa semper ku mi ke bira dòkter di bestia. Esei tabata mi soño.”
Asistente di dòkter di bestia
E pashon ei a hib’é Hulanda, kaminda el a sigui un estudio pa asistente di dòkter di bestia. Sinembargo su kurason a keda Boneiru. “Mi no kier a keda djes aña na Hulanda. Mi tabata sinti falta di mi kas. Mi a nase i lanta na Boneiru i finalmente kier a bolbe kas.”
E estudio no a dun’é solamente konosementu, pero a fortifiká tambe su motivashon pa nifiká algu pa bestianan riba e isla. “Komo mucha mi tabta mira asina hopi bestia riba kaya i asina hopi maltrato. Mi kier a yuda semper. Mi soño ta te ainda pa un dia tin un tereno grandi kaminda mi por akohé i kuida bestia.”
Ranger di Parke Marino
Aktualmente Montero ta traha komo Ranger di Parke Marino na STINAPA, un empleo ku ta korespondé perfektamente ku su pashon. “Mi ta traha tur dia den naturalesa. Esei ta den mi kurason. Sea ta bestia òf naturalesa, mi ke keda komprometé mi mes pa esei.”
Hustamente pa esei el a disidí di partisipá na Miss Boneiru. “Hopi hende ta pensa podisé ku un elekshon di miss no tin nada di haber ku bestia. Pero pa ami esaki ta un oportunidat di laga tende mi mensahe. Mi ke pidi atenshon pa bestianan ku no tin bos.”
Kulturanan
Riba podio e ke mustra kiko Boneiru ta para p’e. “Boneiru tin asina hopi diferente kultura, asina bunita naturalesa i asina hopi bestia spesial. Mi ke trese i mustra tur eseinan.”
Banda di su trabou Katherine ta tambe mama di un yu muhé di dos aña. Un bida drùk, sigur awor ku e preparashonnan pa e elekshon ta den plena marcha. “Bon mirá mi no ta sobra nada di tempu” e ta hari. “Pero si bo tin un meta i ta haña algu importante di bèrdat, bo ta traha tempu p’e.”
Tayer- i entrenamentunan
E último lunanan tayernan, entrenamentu i desaroyo personal tabata sentral. “Nos a siña asina hopi. Papia den públiko, etiketa, protokòl, siña konosé bo mes mihó. Esei ta kosnan ku bo ta karga pa resto di bo bida kubo.”
Sinembargo tur kos no ta di mes p’e. Kaminda sierto kandidato tin problema ku pasarela, su reto mas grandi ta otro kaminda. “Papia den públiko ta keda pa ami e parti mas difísil. Mi ta bira nèrvioso i tin biaha mi ta haña black-out. Esei ta mi reto di mas grandi.”
Hustamente p’esei el a disidí di bai e reto. “Mi a bisa mi mes: mi ta aseptá e reto aki. Mi ke krese i bira mas fuerte.”
Makiyahe
Notabel ta ku Montero ta sintié mas na kas entre karate, naturalesa i outo ku entre makiyahe i gleter. “Bon mirá mi no gusta makiyahe mashá” e ta bisa hariendo. “Mi sa mas di outo ku mi sa di makiyahe. Esaki no ta mi mundu di bèrdat.”
Pero esei ta hasi su partisipashon spesial. “P’esei mi ta bisa semper: mi ta hasi esaki ègt pa naturalesa i pa e bestianan.”
Apesar di e karakter kompetitivo di e elekshon e ta enfatisá ku tin hopi respèt i amistat entre e tres kandidatonan. “Nos a konstruí un hermandat. Naturlamente nos tur ke gana, pero nos ta sostené otro tambe. Si un di nan gana, lo mi ta kontentu i keda apoy’é.”
Final ta na kaminda
Ku algun siman pa bai ainda Montero ta en espera di e nochi final di 4 di yüli. “E ta emoshonante, pero mi ta hopi ansioso. Loke sea ku sosodé, mi ta orguyoso ku mi a dal e stap aki.”
E artíkulo aki ta forma parti di un seri kaminda e tres kandidatonan pa Miss Boneiru 2026 ta presentá nan mes. Promé a publiká e storia di Caroline Porras. Vivienne Vollebregt tambe ta konta den un entrevista apart di su motivashon i su kaminda pa e anochi di elekshon di 4 di yüli na Delfins.