Konferensia di Kuido 2026 ta trese sektor di kuido huntu i ta marka lansamentu di Unite in Care

KRALENDIJK – Riba djárason 10 i djaweps 11 di yüni a tuma lugá na Boneiru e Konferensia di Kuido ‘Futuro di kuido na Hulanda Karibense: Huntu fuerte pa kuido di salú’. E konferensia, organisá pa Zorg en Jeugd Caribisch Nederland (ZJCN), a enfokáku riba tres tema: infrastruktura di kuido, merkado laboral i prevenshon. Un momentu spesial tabata e lansamentu di Unite in Care, un plataforma nobo pa konektá dunadónan di trabou, empleadonan i buskadónan di trabou den e sektor di kuido i bienestar di Hulanda Karibense.

Un grupo grandi di profeshonal di kuido, maneho i investigadónan a bini huntu pa profundisá den e retonan di kuido na Hulanda Karibense. A diskutí kolaborashon entre dunadónan di kuido médiko i entre e islanan, i a pone atenshon na rekomendashonnan di e Komishon di Kuido Hulanda Karibense.

E konferensia a risibí un bon biní di John Soliano, gezaghèber di Boneiru, i un mensahe di video di Minister Mirjam Sterk. Vários eksperto a kompartí nan konosementu durante presentashonnan inspiradó i tayernan rònt di tópikonan manera liderazgo, entrenamentu, datouzo den kuido i nutrishon.

Durante e konferensia, vários organisashon a firma akuèrdonan di kolaborashon. Fundashon Mariadal i Scholengemeenschap Bonaire a firma un konvenio pa un trayekto di formashon, mientras Fundashon Mariadal, Mental Health Caribbean, Zorg en Welzijn Groep, Fundashon Kuido pa Personanan Desabilitá i Stichting Project a firma un deklarashon di intenshon pa uni forsanan den servisionan di sosten.

Lansamentu di plataforma

E plataforma Unite in Care, lansá durante e konferensia, ta bisa tur informashon tokante trabou den kuido huntu den un lugá sentral. E plataforma ta destiná pa dunadónan di trabou, empleadonan i buskadónan di trabou i ta apoyá desaroyo profeshonal i un merkado laboral saludabel na Hulanda Karibense. E wèpsait ta ònlain: www.uniteincare.com.