KRALENDIJK – Pianista Lestari Scholtes i violinista Eduardo Paredes Crespo a duna un konsierto diarason 14 di òktober na Corallium Hotel na Boneiru. E konsierto, organisá pa Classical Music Board Bonaire, a atraé un bon kantidat di públiko.
E programa a kombiná músika klásiko ku komposishonnan ku influensia karibense. E duo a interpretá entre otro obranan di Vitali i Johannes Brahms. Despues di pauze, a sigui komposishonnan di Claude Debussy, Wim Statius Muller i Jacobo Conrad, entre nan Clair de Lune di Debussy, Nostalgia di Statius Muller i Pan Angelical di Conrad.
E konekshon entre diferente tradishonnan musikal tabata sentral durante e konsierto, ku atenshon spesial pa e influensia di músika folklóriko riba komposishonnan klásiko.
E siguiente mainta Scholtes i Paredes Crespo a duna tambe un konsierto na eskala chikí pa mucha di un sentro di kuido despues di skol. Durante e aktividat, e muchanan a siña konosé e violin i a haña oportunidat pa hasi músika nan mes.
Despues di nan estadia na Boneiru, e duo ta sigui pa Kòrsou, kaminda nan tin un siguiente presentashon programá.