KRALENDIJK – E bríndis mensual di empresarionan na Boneiru a hasi un kòmbèk djaweps 15 di òktober. Na HYPE Beach Club, e anterior Spice Beach, vários kompania- i empresarionan a bini huntu pa topa otro, interkambiá eksperensia i pone kontaktonan empresarial nobo. E enkuentro ta marka regreso di un tradishon ku a para na 2020.
E promé edishon di The Business Club Bonaire a trese empresarionan di diferente sektor huntu den un ambiente informal kantu di playa. E inisiativa ta pa brinda empresario- i personanan independiente riba e isla un oportunidat fiho pa keda den kontakto ku otro i amplia nan ret.
Foto: Flavio Maestroni Organisadó Paulo Allee ta wak bèk riba e promé edishon
Organisadó Paulo Allee, direktor di IM&D B.V., a gradisí na final tur esnan presente pa nan presensia i kompromiso. E asistensia grandi ta suprayá segun e organisashon e interes pa un enkuentro di ret pa e sektor empresatial ku ta ripití.
Retrospekshon riba e promé bríndis
Tabata un momento spesial durante e anochi ei ora Allee a mustra pòtrètnan di e promé bríndis di empresario. Asina esnan presente a haña un bista di orígen di e tradishon, ku ta rebibá despues di un interupshon di algun aña.
E organisadónan ke tene e periodo benidero kada luna un edishon nobo. Tambe empresanan lokal ta haña e posibilidat pa organisá òf spònser un anochi durante enkuentronan den futuro i presentá nan aktividatnan na otro empresarionan.