Promé bùs pa transporte públiko ta yega Boneiru

KRALENDIJK – E promé bùs destiná pa transporte públiko na Boneiru a yega isla djarason 14 di òktober. Ku esaki, Entidat Públiko Boneiru (EPB) ta duna un paso mas den preparashon pa introdusí un servisio di transporte públiko riba isla.

Segun e planifikashon aktual, e promé bùs lo kuminsá kore riba un ruta temporal. Na kuminsamentu di 2027 ta spera yegada di kuater bùs mas, ku lo hasi posibel pa amplia e servisio ku un skema di ruta nobo. EPB ta kolaborá ku Autobusbedrijf Curaçao (ABC) pa prepará e servisio.

Diputado Dennis Martinus a ekspresá su satisfakshon ku yegada di e promé bùs. Segun Martinus, habitantenan di Boneiru ta wardando hopi aña kaba riba un sistema di transporte públiko. E ta konsiderá e servisio un fasilidat importante pa komunidat.

E transporte públiko lo ta aksesibel pa tur hende. Sinembargo, ainda no a anunsiá un fecha eksakto pa inisio di e servisio.

Den e periodo binidero EPB lo publiká mas informashon tokante e rutanan, paradanan, orarionan di salida i e dianan ku e bùsnan lo kore.