KRALENDIJK – Lider interino di UPB, Jolinda Craane, a presentá su vishon pa futuro di Boneiru durante un enkuentro bou di e lema “Huntu Pa Futuro”, ku a tuma lugá djasabra anochi na Van der Valk Hotel. E evento a reuní empresarionan, invershonistanan i representantenan di diferente sektor.
Den su presentashon, Craane a pone énfasis riba desaroyo ekonómiko, koperashon i e oportunidatnan ku Boneiru tin pa futuro. Segun Craane su vishon ta basá riba tres prinsipio: “Protehá, Invertí i Konektá”, esta protehá loke ta balioso pa Boneiru, invertí den desaroyo di e isla i stimulá konekshonnan entre personanan i sektornan.
Durante e anochi, diferente oradó a duna nan perspektiva riba desaroyo di Boneiru. Entre nan tabata parlamentario Larmonie Cicilia di Kòrsou, anterior direktor di KLM Peter Hartman i anterior vise premier di Antias Hulandes, Burney el Hage.
Pòtret: Jolinda Marketing Team Hartman a papia tokante retonan ku Boneiru a enfrentá den pasado, mientras ku El Hage a trata e desaroyo polítiko ku a hiba Boneiru na un relashon mas direkto ku Hulanda. El Hage a pone énfasis riba e oportunidatnan ku e relashon aki ta ofresé i e importansia pa Boneiru hasi uso di nan.
E programa a inkluí un sena di sinku plato, músika, presentashonnan di baile i un subasta di obranan di arte i otro artíkulonan.
Ku e enkuentro, Craane a buska pone e tema di kolaborashon entre sektor públiko i privá i e desaroyo futuro di Boneiru riba agenda.