KRALENDIJK – Kamógrafonan lokal ta sinti nan mes ekskluí durante Regatta 2026. Un kompania di medio na Boneiru ta indiká ku videógrafonan lokal no a haña e mesun derechonan ku otro kompanianan. Segun e kompania, durante edishonnan anterior e situashon tabata diferente. Otro fotógrafonan i videógrafonan di e isla tambe ta indiká ku nan no a risibí enkargonan di trabou durante e edishon di e aña aki.
Komunikashon i merkadeo di e festividadnan ta den man di Massive Productions Curaçao e aña aki. Ademas, un di e sponsornan di Regatta a laga un fotógrafo bin for di Kòrsou pa kubri e evento na Boneiru. Esaki ta lanta pregunta tokante e oportunidatnan pa profeshonalnan lokal durante un evento ku ta tuma lugá na Boneiru.
TCB no ta envolví e aña aki
E papel di Tourism Corporation Bonaire (TCB) tambe a kambia. E organisashon di turismo no ta envolví den organisashon di Regatta e aña aki. Elesiër Angel di TCB a konfirmá esaki den un reakshon por eskrito.
Segun Angel, manera a indiká anteriormente, TCB no ta envolví den organisashon di Regatta e aña aki. Pa e motibu ei, e no por hasi deklarashonnan tokante e asunto. Pa mas pregunta, e ta referí na organisadónan di e evento.
Medionan lokal no a haña enkargo
Fotógrafonan i videógrafonan lokal ta indiká ku nan no a haña enkargo di trabou pa Regatta e aña aki. Un kompania di medio di Boneiru ta deklará ademas ku videógrafonan lokal no a haña e mesun derechonan ku otro kompanianan riba i rondó di e esenario prinsipal den sentro di Kralendijk. Segun e kompania, esaki tabata diferente durante edishonnan anterior.
Silberie ta referí na kambio di lokalidat
Diputado Timoteo Silberie ta kontradesí ku a pone TCB na banda intenshonalmente. Segun e diputado, e organisashon di turismo a retirá su partisipashon despues ku na último momento a disidí pa organisá e festividadnan na un otro lokalidat.
Segun Silberie, TCB ta keda un partner pa edishonnan futuro di Regatta. E aña aki, segun e diputado, no tabata prudente pa trata di organisá e kolaborashon na un término asina kòrtiku.
TCB ta sigui envolví den merkadeo lokal, miéntras ku komunikashon i merkadeo mas amplio ta den man di Massive Productions.
Desishon tokante lokalidat a tarda
Segun Silberie, e proseso di tuma desishon tokante e lokalidat di e festividadnan a dura mas largu ku tabata sperá. E Taskforce tabata trahando kaba pa algun tempu riba un konseho tokante e lokalidat. Kolehio Ehekutivo a risibí e konseho aki na ougùstùs, despues di kua a sigui e proseso di tuma desishon.
Segun Silberie, e falta di klaridat te na un momento tardá a tin konsekuensianan pa preparashon di e festividadnan i e kolaborashon ku TCB. E parti di kompetensia di bela di Regatta, segun dje, no a sufri konsekuensianan di esaki.
Silberie ke pa e lokalidat di e siguiente edishon keda determiná kaba na yanüari. Tambe kontraktonan i akuerdonan tokante merkadeo i patrocinio mester keda regla mas tempran. Esaki mester duna tur partidonan envolví mas tempu pa prepará e festividadnan debidamente.
Otro lokalidatnan ta bou di konsiderashon
Pa edishonnan futuro, Silberie ke evaluá e eksperensianan di e aña aki. Sentro di Kralendijk ta un di e posibel lokalidatnan, pero tambe a menshoná Brionplein. Un lokalidat mas den direkshon di stadion ta otro opshon, ounke e diputado ta puntra su mes si esaki no ta muchu leu for di sentro.
A pidi Angel tambe pa e rapòrt riba kua Silberie ta basá su splikashon. Te na e momento aki no a risibí e rapòrt aki.
Organisadónan di Regatta tampoko no a reakshoná riba preguntanan tokante e krítika di medionan i e oportunidatnan pa kamófrafo di Boneiru pa haña enkargonan durante e evento.