KRALENDIJK – E delegashon Boneriano di bodybuilding tabata presente na e di 53 edishon di IFBB Central American & Caribbean Championships na Guatemala. Maaike Krans a optené e miho klasifikashon ku un di dos lugá den e kategoria Masters Bikini Fitness riba 35 aña.
E delegashon a sali djaweps for di Boneiru i tabata konsistí di e atletanan Maaike Krans, Carlos Naranjo i Jose Saleh. Coach Alison Maria i miembronan di BBFA Angelo Engelhart i Judel Emerenciana a biaha ku nan. Via Kòrsou i Panamá e biaha largu a bai Guatemala.
Djabièrnè tabatin e inskripshon ofisial. Finalmente atleta di 21 pais di Amerika Sentral i área di Karibe a partisipá na e kampeonato internashonal.
Carlos Naranjo a kompetí djasabra den dos kategoria semi-pro. Den Classic Bodybuilding Masters te 50 aña el a kaba na di sinku lugá. Den Classic Bodybuilding te 70 kilo el a sali na di kuater lugá.
Foto: Maaike Krans
Jose Saleh
Jose Saleh tambe tabata diferente biaha den akshon. El a bira number sinku den Semi Pro Classic Bodybuilding Masters riba 50 aña i na di kuater lugá na Classic Bodybuilding te 85 kilo. Un dia despues el a optené tambe un di sinku lugá den kategoria amatùr Classic Bodybuilding riba 175 centimeter.
Krans a aparesé djadumingu den tres kategoria amatùr riba podio. Banda su di dos luga den Masters Bikini Fitness riba 35 aña el a kaba na di seis lugá den Bikini Fitness riba 166 centimeter i na di sinku lugá den Fit Model.
“Tabata un eksperensia hopi spesial pa por a representá Boneiru na un evento internashonal asina grandi”, Krans ta bisa. E partisipashon ta bai pa mas ku prestashonnan individual so, segun e. “Naturalmente nos ta un isla chikitu kompará ku hopi pais grandi ku ta partisipá. E ta hopi impreshonante pa mustra e ora ei ku nos por partisipá komo Boneiru i por kompetí internashonalmente ku atletanan riba nivel haltu di otro pais.”
Foto: Maaike Krans
Inspirá
Segun Krans e atletanan por a partisipá danki na sosten di Bonaire Building and Fitness Association (BBFA) i diferente spònser. E ta spera ku e partisipashon internashonal ta motivá otro bodybuilder tambe na Boneiru. “Mi ta spera spesialmente ku nos por inspirá otro atleta den bodybuilding na Boneiru ku esaki pa partisipá otro aña tambe.”
Krans mes ta mira ku orguyo bèk riba su resultadonan, ounke el a spera promé riba un klasifikashon mas haltu den sierto sekshon. Partikularmente su espektativanan tabata mas haltu den Fit Model.
Pa e kategoria ei el a laga traha un shimis i un trahe di baño spesial di bandera Boneriano. “Mi ta sumamente orguyoso di e isla kaminda mi ta biba sinku aña largu kaba ku hopi plaser. Pa ami esaki tabata un deklarashon adishonal pa por a representá Boneiru ku orguyo.” Segun Krans el a haña hopi komplimènt pa su vestuario durante e evento.
Ku e resultado por sali finalmente otro ku a spera, ta parti di e deporte segun e. “E ta keda un deporte di hurado, kaminda resultadonan tin biaha ta finalisá otro ku a spera. Pero sinembargo tabata un eksperensia fantástiko i mi ta wak bèk riba dje ku plaser i orguyo.”
Krans ta gradisí tambe su coachnan Alison Maria i Queenie Lacrum pa nan guia i sosten. “Den bodybuilding ta sumamente importante pa tin un bon tim di profeshonal rònt di bo den preparashon pa un kompetensia internashonal.”