Fiesta na Plaza Wilhelmina te despues di mei anochi

KRALENDIJK – E fiesta kultural di Dia di Boneiru ta tuma lugá djadumingu 6 di sèptèmber for di 12’or di mèrdia riba Plaza Wilhelmina na Kralendijk. Te mei anochi tin presentashon, tèntnan ku kos di kome i di bebe i artesania lokal. E dia ta kaba 23.45 or’ ku un show di vürwèrk.

DJ Marv ta toka di 12’or te 18.00 or’, despues DJ Veloce ta sigui te mei anochi. Entre 16.45 or’ i 17.15 or’ presentadó Aimed Ayubi ta yama públiko bonbiní. Na e momento ei ta onra e siudadanonan di honor un biaha mas, pa despues Juliëndra Janga i Raiza Wilsoe, ku ta e ganadónan di Ban Kanta Bo Boneiru 2026, kanta nan kansion.

Presentashonnan

Pa 17.15 or’ ta kuminsá e programa musikal ku Moka & Kids, siguí pa Silver Bullet Steelband pa 18.15 or’. Despues Foyan Boyz (19.00 or’), Palu Grandi (20.00 or’), Semii Marten (21.00 or’) i Batanga (22.00 or’) ta riba tarima. Doble R Puru ta klousurá e anochi for di 23.00 or’. Pa 23.45 or’ ta kuminsá e show di vürwèrk.