KRALENDIJK – Boneiru ta krese ainda, pero e isla ta pará dilanti di retonan ekonómiko signifikante segun Direktor Gerente General di Maduro & Curiel’s Bank (MCB). Spesialmente e bahada di turismo, preisnan haltu di bibienda i e importansia di un gobièrnu stabil mester di atenshon segun e.
Domacassé a papia djaweps anochi durante un enkuentro spesial pa miembronan di prensa. E banko a organisá e anochi komo muestra di apresio pa media i a duna na mes momento inisio pa un aña ku hopi aktividat rumbo pa 65 aña di eksistensia di MCB Boneiru na luna di sèptèmber 2027.
“E último djes, djessinku aña Boneiru a krese hopi. E poblashon, e ekonomia. I bo ta mira esei tambe den un banko”, segun Domacassé. Segun Domacassé MCB ta krese huntu i ta konta mientrastantu ku 109 empleado na Boneiru.
Preukupashon pa turismo
E kresementu ei no ta nifiká ku no tin preukupashon. E ta mustra spesialmente riba e desaroyonan den turismo.
“Aktualmente nos ta den un situashon difísil pa loke ta trata turismo”, e ta bisa. Segun Domacassé por mira un bahada entre otro den bishitantenan for di Merka. Esei ta debi segun e na tantu konekshonnan aéreo komo merkadeo di e isla.
MCB mes no ta ripará e desaroyo ei dirèkt, pero sierto klientenan si segun e. “Na sierto momento bo ta bai ripará esei den ekonomia.”
E direktor di banko ta mustra tambe riba e merkado di bibienda. “Bo no ta haña kas pagabel. Hopi karu. Pues esei ta un problema.”
‘Mester di un gobièrnu stabil’
Domacassé ta enfatisá tambe e importansha di stabilidat polítiko. “Bo mester di un gobièrnu stabil i nos mester invertí.”
Ku bista riba elekshonnan di konseho insular pa otro aña e ta yama stabilidat un tema importante. “Elekshonnan di otro aña ta hopi importante. Ohalá ku nos por haña un gobièrnu stabil di bèrdat. Bo mester di e stabilidat pa e isla.”
Otro aña MCB ta kumpli 65 aña
E enkuentro di djaweps tabata tambe inisio di e aña di hubileo di MCB Boneiru. Na sèptèmber 2027 e banko ta kumpli 65 aña riba e isla.
MCB ke organisá diferente aktividat durante e aña benidero. Riba 13 di sèptember e programa ta kuminsá ku un misa na Rincon. Tambe lo tin aktividatnan pa hubentut, grandinan, kultura i deporte. Tambe Domacassé a anunsiá un aktividat deportivo nobo grandi, pero no kier a divulgá detayenan ainda.
E banko ta fuertemente komprometé kaba ku aktividatnan sosial na Boneiru. Asina Domacassé ta menshoná por ehèmpel Copa Lito, e programa di futbòl kaminda kasi 1.300 mucha i hóben ta partisipá.
Apresio pa prensa
MCB ta organisá tur aña un enkuentro pa prensa lokal. Domacassé ta bisa di ta hasi esei konsientemente debí na e ròl ku periodistanan ta desempeñá riba e isla.
“Boso ta pèrkurá pa e komunidat ta bon informá. Boso ta krítiko”, e ta bisa. Kobertura negativo di banko tambe ta den segun e. “Esei ta boso trabou. Kosnan ku ta bai bon, pero tambe kosnan ku no ta bai bon.”
Segun Domacassé e krítika ei mester keda spesialmente konstruktivo. “Pa ami e ta semper importante: konstruktivo.”