WILLEMSTAD – Komité di Konmemorashon Pasado di Sklabitut i Fundashon NAAM a firma un akuerdo di kolaborashon riba djabièrnè 16 di òktober. E akuerdo, ku ta vigente te ku 2029, tin komo meta di amplia konosementu tokante pasado di sklabitut i hasi herensia históriko i kultural di e seis islanan Karibense mas aksesibel.
Lucia Beck-Fox, direktor pa parti Karibense di Reino di e komité, i direktor di NAAM, Dimitri Cloose, a firma e akuerdo.
Pòtret:Komité di Konmemorashon Pasado di Sklabitut E kolaborashon ta konsentrá riba kuater proyekto. E promé ta un inventarisashon di publikashonnan eksistente tokante historia di sklabitut na Aruba, Boneiru, Kòrsou, Saba, Sint Eustatius i Sint Maarten. E informashon aki mester yuda identifiká tópikonan ku ainda ta rekerí mas investigashon.
Un di dos proyekto ta relashoná ku konmemorashon di 100 aña di nasementu di Elis Juliana na 2027. E programa ta inkluí publikashonnan, material edukativo, aktividatnan públiko i un eksposishon ambulante tokante su aporte na idioma, arte i kultura Afro-Karibense.
Ademas, e organisashonnan ta traha riba un kolekshon i mapa digital ku ta reuní resultadonan di investigashon, publikashonnan i otro proyektonan relashoná ku pasado di sklabitut.
Pòtret:Komité di Konmemorashon Pasado di Sklabitut E di kuater proyekto ta dirigí riba kolekshon Zikinzá, ku ta kontené aproximadamente 1.400 grabashon di oudio ku Elis Juliana i Paul Brenneker a hasi for di añanan 1950. E grabashonnan ta kontené historianan, kantikanan i informashon tokante idioma, sklabitut i bida diario. Un proyekto piloto lo investigá kon por transkribí i hasi parti di e material aki aksesibel pa públiko.
NAAM lo enkargá su mes ku preparashon i ehekushon di e proyektonan, miéntras ku e komité lo kontribuí ku rekursonan i finansiamentu. E aktividatnan lo desaroyá den diferente fase, segun akuerdonan entre e dos organisashonnan.