KRALENDIJK - Fundashon Jong Bonaire ta organisá djadumingu 11 di òktober 2026 atrobe e landamentu anual Swim to Klein Bonaire. Partisipantenan ta landa for di Eden Beach pa Klein Bonaire i por skohe despues pa landa bèk tambe.
E evento ta konsistí di dos parti. E Landamentu Kompetitivo (Competitive Swim) ta kuminsa 7.30 or’, siguí pa Landamentu Rekreashonal (Recreational Swim) 9’or. E distansha ta 800 meter bai so, òf 1,6 kilometer pa esun ku ke landa bin bèk. Partisipantenan ku no por landa bin bèk, por hasi uso di un di e taksinan di awa ku e organisashon ta pone disponibel.
Gastu i ekipamentu
Partisipashon kosta $30, ku un t-shirt di e evento úniko i number di start inkluí. Esun ku no ta landa tambe por kumpra un t-shirt. E organisashon ta enfatisá ku partisipantenan mester ta bon di salú i den bon kondishon i ta pidi landadónan pa sigui reglanan di e evento i eventual atvertensianan di wer. Ekipamentu rekomendá: zeta kontra kimá di solo i sapatu di laman.
Por inskribí te ku 9 di òktober
Por inskribí te ku 9 di oktober, of te kaminda tin lugá disponibel, via e formulario online: https://forms.cloud.microsoft/r/jL4sf1xzBi?origin=lprLink