KRALENDIJK – Sektor di kuido den Karibe Hulandes ta na un punto di kèntel, Algemene Federatie van Bonairiaanse Werknemers (AFBW) ta atvertí. Profeshonalnan den kuido na Boneiru, Sint-Eustatius i Saba tin e mésun responsabilidatnan ku nan koleganan na Hulanda Europeo, pero ta traha bou di kondishonnan di trabou struktural desigual, un diferensia ku segun e sindikato no ta toka trahadónan so, pero tambe kalidat, kontinuidat i siguridat di kuido pa habitante di e islanan.
Den un karta habrí na redakshonnan den Reino presidente di AFBW ta hasi un yamada pa rekonosé públikamente un norma fundamental: kuido igual ta rekerí kondishonnan di trabou igual. Den e eksigensia ei introdukshon di e siman di trabou di 36 ora, ku e sindikato ta deskribí komo un instrumento esensial pa respaldá e igualdat ei bèrdaderamente, ta para sentral.
Preshon di trabou i mantenshon di personal
Segun AFBW e siman di trabou redusí no ta algu èkstra, pero un medida nesesario pa baha e preshon di trabou den kuido, prevení personal ku ta kai afó i mantené trahadónan den kuido pa e sektor. “Den un komunidat chikitu kaminda kada profeshonal ta konta, esaki ta un kondishon esensial pa kuido sigur,” segun e presidente ta bisa den un karta.
E sindikato ta mustra ku sin intervenshon e sektor ta keda vulnerabel: personal ku ta kai afó den komunidatnan chikitu di e islanan ta mishi mésora ku disponibilidat di kuido, ku riesgo pa pashent- i habitantenan komo konsekuensia.
Yamada na Reino
AFBW ta dirigí su mes ku su yamada riba un kadena mas ámplio di partidonan responsabel i ku influensia den Reino, entre kua:
· minister di Salubridat, Bienestar i Deporte;
· gabinete bou di liderasgo di Promé Minister Rob Jetten;
· Eerste i Tweede Kamer;
· sindikatonan FNV, CNV i NU’91;
· Coördinator Nationale Dienst Caribisch Nederland (NDCR);
· Kolegio pa Derechonan Humano;
· Defensor di Pueblo Nashonal;
· Lokèt Hurídiko BES.
E sindikato ta enfatisá pa no mira e yamada komo un ponensia polítiko, pero komo un nesesidat sosial. “Profeshonalnan den kuido na Karibe Hulandes meresé e mésun protekshon, e mésun apresio i e mésun kondishonnan di trabou manera kada profeshonal den kuido den Reino,” segun e presidente.
Ku e karta AFBW ta spera ku media lo pone atenshon na e kaso, di moda ku igualdat “no ta keda mas na un promesa, pero ku e ta bira un regla”.