KRALENDIJK – Tourism Corporation Bonaire (TCB) i Fundashon Históriko Kultural Boneriano (FuHiKuBo) ta uni forsa huntu ku e grupo di kanamentu Chantiwawa pa hasi Boneiru mas aksesibel, mas visibel i mas agradabel pa tantu habitantenan komo bishitantenan.
Pa medio di e kolaborashon akí e organisashonnan ta bai traha huntu pa sigui desaroyá i promové e rutanan di kanamentu na nos isla mas aleu, di manera ku hendenan ta haña oportunidat pa eksperensiá Boneiru su naturalesa, kultura i historia na pia.
Chantiwawa, un grupo di amante di naturalesa i boluntario ku ta aktivo bou di FuHiKuBo, ta bini ku eksperensia amplio riba tereno di identifikashon, limpiesa, markamentu i mantenshon di ruta di kana. FuHiKuBo ta kontribuí ku su konosementu históriko i kultural, miéntras ku TCB ta bai sostené digitalisashon i promoshon di e rutanan.
Un komponente importante di e kolaborashon ta mehorashon di aksesibilidat digital i indikashon di ruta. Riba e rutanan selektá di kanamentu ta bai pone informashon digital disponibel, inkluyendo mapa, deskripshon di ruta, grado di difikultat, atrakshon turístiko i informashon kultural i históriko relevante. Bòrchi di indikashon di ruta na komienso di e rutanan, ku entre otro QR-code ku ta kondusí na informashon digital, den kombinashon ku sierto markashon a lo largo di e rutanan, lo yuda e kanadónan orientá nan mes na un manera mas fásil i mas seif riba e rutanan.
“Boneiru tin asina tantu mas pa ofresé ku solamente e eksperensianan na kosta i di buseo. Nos rutanan di kanamentu ta brinda un otro manera pa deskubrí nos isla i su naturalesa, historia i kultura. Pa medio di e kolaborashon akí nos ke hasi e eksperensianan akí mas aksesibel i mas fásil pa haña, i na mes momentu enkurashá hendenan pa eksplorá Boneiru na un manera responsabel,” segun Elesiër Angel, direktor di TCB.
E kolaborashon ta enfoká tambe riba fortifikashon di apresio pa patrimonio di Boneiru, pa medio di konektá bishitantenan i habitantenan ku e storianan, paisahenan i elementonan kultural ku nan por haña a lo largo di e rutanan di kanamentu na nos isla.
E partidonan lo kuminsá ku identifikashon di algun ruta di kanamentu nobo i eksistente pa digitalisashon, mihó indikashon di ruta, mantenshon i promoshon, i despues lo sigui mas ruta i aktividat pa komunidat.
TCB, FuHiKuBo i Chantiwawa ta spera di por enkurashá mas hende pa deskubrí Boneiru na pia, na un manera seif i responsabel, i ku un apresio mas profundo pa e naturalesa, e kultura i e patrimonio úniko di nos isla.